Shillong, Jymmang 19: Ka sorkar Meghalaya ka la buh ia ka thong ba ha ka plan san snem kaba 11th kan pynioh light sha baroh ki shnong ha ka jylla baroh kawei kaba mut 100% . Hynrei na ka liang jong ka sorkar kan shym la lah ban leh kumba ka la buh ia ka thong jong ka.
Ban pynurlong ia kane ka jingbuh thong jong ka sorkar ha ka 18.3.2005 ka la thoh sha ka Rural Electrification Corporation (REC) Limited ban pan pisa na ka bynta ban pynioh light ia ki 1943 tylli ki shnong kiba khlem pat ioh light bad ia ki 370 tylli kiba la ioh hynrei la pynduh.
Kane ka jingpan skhim jong ka sorkar Meghalaya ka long na ka Rajiv Gandhi Grameen Vidyutikaran (RGGV) REC ka la dep ban ai ia ka jingpan jong ka sorkar Meghalaya, hynrei ka jingai ka long ba ka sorkar pdeng kan bei 90% na ka jinglut baroh bad ka sorkar jylla ka hap ban sei 10%.
Ka lad kaba ka sorkar pdeng lyngba jong ka REC ka la shah ia ka sorkar jylla ba lada kam don ia ka pisa 10% ban sei na ka pla jng ka sorkar jylla ka lah ban shim ia katei ka pisa na ka REC ha ka dur jong ka Ram.
Ka sorkar Meghalaya kala pynkhreh iaka project ha katei ka por bad pyni ba ynda ki ioh ia katei ka skhim baroh ki shnong ha kane ka jylla kin sa ioh light hapoh jong ka plan san snem kaba 11th.
Naka liang jong u Project Director jong ka REC kaba don ha Shillong, la ong ba ka jylla Meghalaya kala pan skhim na ka REC ha u snem 2005 bad haduh mynta kam shym la pan ei ei shuh. La ong ba ka daw ka lah ban long ba kam pat lah ban pyndep ia ki skhim kiba la dep ban ai ha u snem 2005.
Na ka liang jong ka REC kam don jingeh ei ei ban iarap lada ka sokrar ka wan ban pan jingiarap lada ka la lah ban pyndep ia ki skhim kiba la dep ban ai. Kumba ka long haduh mynta kam shym don kano kano ka jingpyntip, lada ka sorkar kam shym la lahb an pyndep ha ka plan san snem kaba 11th ka lah ban pyndep ruh ha ka plan san snem kaba 12th kaban sdang mynta u snem.(SP News)
