Shillong, Naiwieng 30: Ka Khmih Shillong Group, ka kynhun ki nongrwai jong ki khynnah rit kynthei kiba don 10 ngut kiba dang ha ka karta 9-12 snem ki la jam kham shakhmat ha ka round jong ka India’s Got Talents ba pyniaid da ka Color Channel ha Mumbai Audition ha ka 29 tarik Naiwieng’2013. La synran lang ia ki da ki 4 ngut ki nongtem bad hapoh ka jingialam kaba kyrpang jong U Samla Royal Suting bad Andrew Marwein.
Ka Khmih Shillong Group ka la poi sha ka Mumbai’s Audition hadien ba la jop ha ka Kolkatta’s Audition ha ka 27 tarik ‘Nailur. Dangshen ka Khmih Shillong Group ka la ia shim bynta ha Ka Monolith Festival ha Mawphlang bad ha ka 1 tarik Risaw 2013 ha ka sngi ba plie ia ka 1st Sanshou Wushu Cup 2013 (National) kaba la long ha Indoor Sports Hall Jawaharlal Nehru Sports Complex, Polo Shillong. Kane ka kynhun ki heprit ha kaba kiba bun ki la ong ia ki kum ka Voice of Angels ka la paw khmat bha.
Halor kane ka bynta na ka liang U Deputy Commissioner East Khasi Hills District u la phah ia ki kyntien kyrkhu kyrdoh ia ka group ba kan lah ban jop sha ki kyrdan (round) ba kham shaneng ha ki round kiba dang wan. U Bah Larry P Warjri, Vice President Judo Federation of India bad kumjuh ruh U President Meghalaya Judo Association u phah ia ka kyrwoh jingkmen sha ka kynhun. Kumjuh ruh ka Seng Kur Warjri ka dap da ka jingsngewkmen ba arngut na kine ki nongrwai ki dei na ka kur Warjri.(SP News)
