Shillong Nailur 08: Ki sengbhalang jong ka jylla kila iakynduhlang ha ka sngi saitjain bad kila shim ia ka rai ban pynlong ia ka Pakhang Surok Miet ne ka Night Road Blocade ha ka 10, 11,12 bad 13 tarik mynta u bnai kaban sdang naduh ka por 7 baje mynmiet bad kan kut ha ka por 5 baje mynstep.
Haba iakren bad u Vice President ka KSU u samla Fredrick Kharmawphlang ula ong ba ha ka jingialang kaba la long ha ka sngi siatjain ki nongialam jong ki sengbhalang da kawei ka sur kila shim ia ka rai ban
bteng ia ka Pakhang surok miet bad ula ong ruh ba ka kynhun ki sengbhalang ka ieng beit ha ka nongrim ba ka sorkar kadei ban pyntreikam noh ia ka Inner Line Permit (ILP) ha baroh kawei ka jylla.
Une u nongialam ka KSU ula ong ruh ba ki nongialam jong ki sengbhalang kin sa iakynduh biang ha ka 14 tarik mynta u bnai ban iashong pyrkhat bad ula ong ruh ba lada ka sorkar kam patiaw bad ka dang ialeh kuman ia ka jingdawa jong ki sengbhalang, ki sengbhalang kin dang bteng ban pynlong ia ki jingiakhih bad kin nang kham jur shuh shuh ban pynbor ia ka sorkar ba kadei ban pyntreikam noh mardor ia ka ILP.
Une u samla ula kyrpad ia baroh ki paid kane ka jylla ba kin iasnohkti lang bad ban ai ka jingkyrshan kaba pura bad ban burom ia ka por haba ki sengbhalang ki pynlong ia ki jingiakhih khnang ba kin ym ngat ha kino kino ki jingjia kiba sngewsih na ka jingshimabu jong ki riewshimkabu ha ka por ba dang iaid ki prokram jingiakhih ha kylleng ka jylla bad ula ong ruh ba ki sengbhalang ki ai khublei ia baroh ki paidbah ka jylla bad ia ki nongtrei sorkar kiba la kyrshan bad iasnohktilang ha kane ka jingiakhih jong ki sengbhalang bad ba kin dang bteng ban ai ka jingkyrshan kaba pura ia ki sengbhalang ha ka jingdawa ia ka Inner Line Permit (ILP). (SP News)
