Khot ki seng bhalang ia ka pakhang shnong ba 12 kynta ha ka jylla baroh kwei

Shillong, Nailar 29: Ha dien ka jingiakren bad ka sorkar kam shym la poi shaei shaei ha kaba ia dei bad ka jingdawa ka jong ki seng bhalang ban pyntrei kam ia ka Inner Line Permit ha kane ka jylla, na ka liang jong ki seng bhalang mynta ka sngi ki la pynbna ia ka pakhang shnong ba 12 kynta ha ka 2 tarik jong u Nailur ha ka jylla baroh kawei.

U Presidrnt jong ka seng FKJGP u bah Joe Marwein haba kren ha ki nongthoh khubor ha dien ka jingialang kaba ki la pynlong ha ka ophis trei kam jong ka seng KSU u la ong ba kane ka jingkhot ia kane ka pakhang shnong ka long ban pynbor ia ka sorkar ba ka dei ban pyntrei kam ia ka ILP ha kane ka jylla ban ia da ia ka jingwan tuid ki briew bana bar.

Haba jubab ia ki jingkylli u Bah Marwein u la ong ba lada ka sorkar ka khot biang ia ka jingiakren kin leit tang lada ka sorkar ka ong ba kan pdiang ban pyntrei kam ia ka ILP ha kane kajylla, lada khot ia kren tang ban ia mir jingmud halor kane ka juh ka phang kin nym leit shuh.

U Bah Daniel Khyhriem president jong ka KSu u la ong ba na ka liang jong u Dr Mukul Sangma u la pynlong kam kai ia ka High Level Committee kaba la thaw hi da ka sorkar ka jong u. Haba ia dei bad ka ILP ka la dep don ha kane ka kaba sah ka long tang ban pynim ia ka.

U President jong ka Garo Student Union  u Tengsak G Momin u la ong ba kin nym lah ban shaniah ha ka sorkar ia kita ki jingkular jong ka sorkar kaba bha tam ban iada ia ka jaid bynriew ka long ban pyntrei kam ia ka ILP ha kane ka jylla Meghalaya lada ka sorkar ka shim khia ia kane kumba ka la ong.

U Bah Marwein u la ong shuh shuh ba ka pakhang shnong ha ka 2 tarik Nailur  kan sdang naduh ka por 5 baje mynstep bad lada ka sorkar ka dang iai kuman kin sa shong biang ban ia kren bad ki dang pynjur shuh shuh ia ki jingiakhih haduh ba ka sorkar kan da pyntrei kam ia ka ILP.(SP News)