Shillong, Jymmang 15: kat kum kyrwoh khubor ba la phah da u Bah Nelson Kharbani,Working President Ka Hynñiewtrep Achik National Movement sengkmie (HANM) ka khot wer ia baroh ki sengbhalang ban ia pyrkhat halor ka jingthmu ka sorkar ban buh ia ka ktem ANVC-B kiba hapoh West Khasi Hills bad South west Khasi Hill district.
Ka HANM ka khot bad ia wer ia baroh ki sengbhalang napoh ka bri u Hynñiewtrep ban ia phylliew jingmut halor ka jingthmu ka sorkar ban buh ia ka ktem jong ki kynhun kiengatiar ANVC-B hapoh u pud u sam ka bri u Hynñiewtrep kata hapoh West Khasi Hills District.
Ka HANM (CB) kan pynlong iaka jingialang ha ka 22 tarik mynta u bnai ha shillong bad ka seng kan sa phah ia ki shithi sha baroh ki seng bhalang jong ka bri u Hynñiewtrep bad kin sngewbha ban ia don lang hakane ka por.
Ka sorkar kam khein burom shuh ia ka Khasi Hills Autonomous District Council (KHADC) ki syiem,ki sordar shnong,ki Rangbah Shnong lane ki trai jaka bad ki paidbah katei ka thaiñ la ki mynjur ne em halor kane ka bynta hynrei ka la shu leh donbor.
Dei halor katei ka bynta ka seng ka khot khot bad ka wer ia ki para seng bhalang baroh ban tai halor kane namar kumba ka paw na jingleh ka sorkar imat ka don kaei re kaei sha lyndet.
Kumjuh ruh kum shipara ban lait na kino kino ki jingjia ba sngewsih hadien habud bad khamtam ban lait na ka jingsngew iapher jingbynriew hapdeng ki khasi bad Garo.(SP News)
