Shillong, Risaw 17: Ka seng lehnoh Hynniewtrep national Liberation Council (HNLC) mynta ka sngi lyngba jong u bah Sainkupar Nongtraw Publicity Secretary, u la phah ia ka kyrwoh sha ki lad pathai khubor ba ka seng ka la khot ia ka pakhang shnong kaba 36 kynta, kata ha ka sngi nongkong bad sngi ba ar ka 21 bad 22 tarik mynta u bnai.
Ha kane ka kyrwoh kaba la phah mynta ka sngi la ong ba ka HNLC ka pynkynmaw ia ka bri u hyneiwtrep ba ka 21 tarik mynta u bnai ka dei ka lyngkhuh sngi iap ba 21st jong u Syiem Wickliff u ba ka seng ka shim ba u dei u nongseng ia ka Hynniewtrep Nationalism. Na ka liang jong ka seng HNLC ka khien ba kane ka jingwan jong u President jong ka Ri India ha katei ka sngi ka long kum ka jingjah burom ia ka Hynniewtrep National Day.
Ka HNLC kala kynnoh ba la pynsoi jubor ia ki syiem khasi instrument of Accession and Anexed Agreement ha u snem 1948, wat la ki ia pyrshah namar la ong ba la pynap da ki ktang suloi la kynthop katei ka seng lehnoh. Ki syiem khasi kim don lad ki la hap ban soi.
Kum kadak jong ka jingpyrshah ia kane ka jingwan jong u president jong ka Ri India ka seng HNLC ka la pynbna da ka pakhang shnogn kaba 36 kynta naduh ka por 6 baje mynstep jong ka 21 tarik sngi nyngkong bad kan kut ha ka 22 tarik por 6 baje jan miet.
Na ka liang jong ka seng HNLC ha kane ka kyrwoh ka la kynnoh ban ka sorkar kam shym la shim khia kumno ban leh leh ia kane ka jingwantuid jong ki briew kiba na bar, ban pynbeit ia u pud u sam, ka jingshim jaka jong ki shipai, lane ym shym la shim khia da kita ki briew kiba kam ia lade ba ki dei ki nongmih khmat paidbah. Kine ki nongialam ki don tang ban shakri ia lade bad ia ka seng kaba ki jop election.
La ong ba ka seng HNLC naduh ba la seng ia ka kam don ka jingshahniah ha ka sorkar pdeng lane ha ki nongialam jong ka sorkar India. Ha ka sngi sdang jong ka seng ha ka 14 tarik jong u Nailar 2013 u Genenral Secretary jong ka seng u la pynlait ia ka jingthoh ba ka seng ka kwah ban ia kren ia suk bad ka sorkar pdeng khlem da don kano kano ka jingiateh kyndon hynrei ka sorkar kam shym la jubab ia kane. Ka seng ka kynnoh ba kane ka dei ka jingleh meinah.
Ha kaba ia dei bad ka jingialeh pyrshah jong ka sorkar ia ki samla ban thwet ia ki nongialam jong ki seng bhalang ka long ka jinglehrain ia ka sorkar jylla ba ha ka synshar paidbah kaba la kylla long mynta ka synshar jong ki seng sain pyrthei. Ka seng HNLC ka ong ba kane ka jingleh jong ka sorkar ka pynbor ia ki samla ba kin rah suloi, la pynkut u Sainkupar Nongtraw Publicity Secretary,HNLC. (SP News)
