Tura, Nailur 22: Ka seng lehnoh kaba la pyntriem ia ka Garo Hills baroh kawei ka la pynbna paidbah ba kan pynlong ia ka pakhang shnong ha ka 25 bad 26 tarik mynta u bnai ban pyrshah ia ka jingleh donbor jong ki pulit kiba thwet ia ki dkhot jong ka seng GNLA.
Ka jingshah siat iap jong ki ar ngut ki briew ha Garobada kaba hap hapoh jong ka South West Garo Hills ha kaba u wei u rangbah bad kawei ka kynthei ki la duh ei ia la ka jong ka jingum. Kane ka pakhang shnong kaba la khot da katei ka seng lehnoh kan sdang naduh ka por 5 baje mynstyep haduh ka por 4 baje jan miet.
Na ka liang jong ka seng lehnoh ruh ka la dawa ba ka sorkar ka dei ban pynlait mar dor ia ki 25 ngut ki dkhot jong ka GHSMC kiba don mynta ha phaok ha Jowai. Ka GNLA ka ong ba ka sorkar ka dei ban pynlait noh mardor ia kine ki dkhot khlem da don kano kano ka kyndon.
U SP jong ka South West Garo Hills u R Muthu u la pynthikna ba ka jingdon jong ki seng lehnoh ha katei ka District mynta ka la jyllei bbha bad na ka liang jong ki pulit ruh ki la pynjur shuh shuh ka jingkhynra ia kine ki lehnoh. Ki lehnoh ki la phah ruh ia ki shithi dawa pisa na ki paidbah.
La ong ban a ka liang jong ka seng lehnoh ka dawa na ka sorkar ba ka dei ban sngap ia ka jingdawa ka jong ki bad kita ki jingdawa ki long ba ka sorkar ka dei ban pynduna ia ka jingkhynra ia ki dkhot ka seng GNLA ba dei ban weng noh ia ki shipai jong ka sorkar pdeng na Garo Hills bad ka seng ka la kynthoh pyrshah ia ka sorkar ba kam sngap ia ka jingdawa ka jong ki.(SP News)
