Jowai, Rumphang 10: Ki saw tylli ki sengbhalang ka ri Lum Jaintia ki ba kynthup ia ka AJYWO-Sengkmie, KSU-Jaintia Hills District Unit, ka FKJGP-Khlliehriat Circle bad ka HNYF-East Jaintia Zone, ha ryngkat bad ka Synjuk Rangbah Shnong -East Jaintia Hills ki la shim ia ka rai mynta ka sngi ban khot noh syndon da ka pakhang shnong ba 12 kynta, kata ha ka 13 tarik mynta u bnai naduh ka por 5 baje mynstep haduh 5 baje janmiet ban pynbor ia ka sorkar ban maramot noh ia ka surok National Highway 44 naduh ka thain Tuber haduh ka thain Malidor. Kane ka jingpakhang shnong kan trei kam tang hapoh u pud u sam jong ka East Jaintia Hills District baroh kawei.
“Hadien ba ngi la dep iashah bad ka sorkar mynta da kaba iai ap ia ka ban maramot noh ia baroh ki bynta ba la sniew jong ka NH 44 hynrei haduh mynta ruh ka sorkar kam shym la leh ei ei ruh em. Kumta Ha ka jingiakynduh jong ngi mynta ka sngi, ngi la shim ia kane ka rai ban khot noh syndon da kane ka pakhang shnong ba 12 kynta, ha ka 13 tarik mynta u bnai naduh ka por 5 baje mynstep haduh 5 baje jan miet hapoh u pud u sam jong ka East Jaintia Hills District kum ka dak jong ka jingpyrshah jong ngi ia ka jinglong kuman jong ka sorkar halor ka jingsniew palat jong ka NH 44, kata naduh ka thain Tuberkmai Shnong haduh Malidor.” La ong u Bah M H Dkhar, President jong ka AJYWO Sengkmie.
“Ngi la dep thoh sha ki bor sorkar ban maramot noh ia baroh ki bynta ba la sniew jong ka NH44 hynrei ka sorkar kam shym la sngap ia ka jingdawa jong ngi. Ia mynta ngin khot shwa da kane ka pakhang shnong ba mynsngi. Ngin sa ia peit, lada jia ba ka sorkar ka dang long kuman kumne, ngim banse ban ia thiah noh khlem buh put ha ka surok NH 44 nangne sha khmat” ong u bah C Rymbai, President, ka SRS-EJH.
“Na ka bynta ka bha ka miat jong u paidbah nongleit nongwan lyngba ka NH 44, ym tang ki nong Jaintia hynrei wat kiba na kiwei pat ki jylla jong ka ri India ruh, ngi hap ban khot da kane ka pakhang shnong namar ngi la iohi ba ka sorkar kam shym la patiaw ia ka bha ka miat jong u paidbah nongleit nongwan lyngba jong kane ka surok wat hadien ba ngi lah dep khot pynlong wat da ka pakhang surok miet ha kine ki taiew ba lah dep.” La ong u Bah SS Niangti, General Secretary ka KSU-JHDU.
U Bah WT Rymbai President ka FKJGP-Khliehriat Circle u la ong “Ngi sngewthuh ba ki paidbah ki bunkam elekshon MDC kum ha kane ka por hynrei ngi panmap na ki ba ngi hap ban khot ia kane ka jingpakhang shnong namar ba ka por kam shah shuh ia ngi bang dang iai ap. Lada ym maramot noh ia kane ka surok mynta mynta hi, sa tang katno eh, ka por lyiur kan sa wan bad ba ka leit ka wan jong u paidbah lyngba kane ka surok poi ha ka apot bah”.
U President jong ka HNYF-EJZ, u Bah Julius Nongtdu u la ong ba kat kum ba ka long mynta, ka NH 44 ka la sniew palat ym lah shuh ban batai ha ki thain East Jaintia Hills District, kata naduh Tuberkmai Shnong haduh Malidor lada ia nujor bad kiba ha West Jaintia Hills District. Ka jingsniew jong kane ka surok ka la long ishyrkhei bha naduh Sonapur haduh Malidor. Kumta, ia mynta ka kynti ngin pyllait shwa ia ka West Jaintia Hills District na kane ka pakhang shnong.
“Na ka liang jong ngi ki saw seng bad ka SRS-EJH, ngi kyntu ia baroh ki paidbah jong ka East Jaintia Hills, ki sengbhalang, ki nongialam shnong, ki trai bad driver kali rit bad heh, ki kali shimet bad ki kali kamai bad kiwei kiwei de ba kin sngewbha ban iasnoh kti lang bad ngi ha katei ka sngi pakhang shnong khnang ba kane ka pakhang shnong na ka bynta ka bha ka miat jong u paidbah kan long ka ba jop bad seisoh. Ngin pyllait tang ia ki kali Ambulance bad Mortuary Van bad ki kali ba donkam Emergency kum ha ka pang ka shitom bad ki jingjia ba sngewsih. Lait na kita, ngin khang lut baroh bad ngin ym shah ba kin iaid ha ki surok ha katei ka por pakhang shnong.” la ong u Bah M H Dkhar.(SP News)
