Shillong, Nohprah 20: Ka “Orange Festival” kaba nyngkong ha kane ka jylla Meghalaya kaba la long mynta ka sngi ha Madan Polo ka khring ia ki paidbah jong kane ka nongbah Shillong.
Kiba la wan ban ia shin\m bynta ha kane ka jingpyni iaki soh niamtra ha kane ka kynti ka dei tang na ka thain Sohra, na ka shnong Mawphu, Umblai Nongsteng bad kyntunongrim
. Kane ka long ka jingsdang bad na ka liang jong ka sorkar mynta ka la phai khmat sha ki nongrep.
Haba u SP News Agency u la ia kren bad bun ki nongrep kiba la wan ban ia shim bynta ha kane ka jingia pyninam ia ki soh niamtra ki la pynpaw ruh ia ka jingsngewduh jingkyrmen ka jong ki ha kaba trei ia kane ka kam rep soh na ka daw jong ka jingleh shiliang ha kaba ai ia ki dawai pyniap khniang na ka liang jong ka sorkar.
Katkum ka jiniathuh ka jong ki nongrep kiba la wan ban ia shim bynta ha kane ka jingiapyninam ia ki soh bad ban die ha ka juh ka por ki la ong ba ka jingeh kaba ki ia kynduh la long ka jingbam khniang palat ia ki dieng soh niamtra ha kaba ym lah ban sumar ia ki.
Haba ia dei pat bad ka jingsam ia ki dawai pyniap khniang la ong ba la ai tang ha kito ki briew kiba ioh ia ka jingiarap ne ki diengsoh tynrai na ka tnad rep katba ia kito kiba pynmih hi ia ki symbai katkum ka jinghikai pateng kaba ki la ioh ka sorkar kam juh ai bad kane ka jingai ruh kan long ia baroh hynrei ha ka shishnong la shu jied.
Haba ia dei bad kane ka rep soh niamtra ki nongrep ki la pynpaw ba kim tip na ka daw aiu ba mynshuwa ha ka por ba ka karkhana shna dewbilat kam pat don ha Sohra kam don kane ka jingiap tram jong ki dieng soh hynrei mynta pat ka jingiaptram ka long sha ba palat bad ban trei ia kane ka kam rep soh ka la pynduh jingkyrmen, la ong bun na ki nongrep.(SP NEWS)
