Jowai, Jylliew 24: Ka Jaintia Youth Federation East Jaintia Hills, hapoh ka jingialamjong u President Niwasly Rymbai ka la leit khynra ia ki ba bun ki Restaurant kiba don naduh Mukhep, Ladrymbai bad Khliehriat ha kine ki sngi ka la ioh ban kem shibun ka kiad ba ki ia die beain da ka jing supplied da ki wine store sha ki, kiba don ha Ladrymbai katkum ba ki iathuh bad phla hakhmat jong ki nongialam jong ka seng.
Ka Seng na ka por sha ka por ka la thoh shithi sha ki bor ba halor ban tuklar halor ka jinglong jingman jong ka ne ka thain kaba la jyllei sa tang ki dukan kiad be-ain ha baroh shilynter u surok NH-44 u ba long
ka daw ban ktik ia ki jingmut jingpyrkhat jong ki khun samla, khynnah skul bad wat ki kynthei khynnah ruh ban ngop lang ha ka ne ka apot jong ka jingsniew ha ka imlang ka sahlang bad ki shnong ki thaw pynpaw u Samla Niwasly Rymbai ha ki lad pathai khubor.
Shuh shuh na ka liang jong ka JYF-EJH ka pynpaw ia ka jingbynniaw halor ka jingjyllei palat ki dukan kiad be-ain ha East Jaintia Hills District, kam banse shuh khlem da shim ia ka ne ka bynta ka ba bha ha ryngkat ka jingiatreilang bad ka tnad Excise ban khynra bad kem beit ia ki nongdie be-ain namar ngi la sngewthait ia ka jingbein jingkynnoh palat ki briew ba ha East Jaintia Hills ka ain ka kylla khongpong lut
namar ba jur than ka jingtuklar ki heh spah ki bym don shuh ka jingpyrkhat ia ka lawei ki khun ki kti jong ki tang ban ioh kamai spah jot ki long ing long sem ruh biang ong u Samla Niwasly Rymbai President ka JYF-EJH.
Kumjuh ruh ka Seng ka ai khublei ia ka tnad excise kaba long lah kloi ban ia treilang bad ka seng ha ka ban pynduh jait ia ka ne ka jingdie kiad be-ain hapoh ka ne ka thain, bad ka seng kan sa iai bteng shuh
shuh ia ka ne ka jingleit khynra ha kiwei kiwei pat ki jaka kiba ka seng ka la ioh shibun ki jingujor na ki paitbah jong ka thain,
Ka jingioh mon palat jong ki nongdie kiad be-ain ha East Jaintia Hills imat dei na ka daw ba ki bor shnong kim don ka jingkit khlieh ban chek ban peit ia ka bha ka miat jong ka shnong ka thaw kumjuh ha ka imlang sahlang, hynrei lada ngi bishar bha ia ka jingkiew sted ki jingsniew ha east jaintia hills, ki rangbah shnong kim dei shuh ban ia shong thiah sngi namar ka tynrai jong ka jingjot ba jia ki kam Rahbor, thombor, pyniap bad leh beijot dei na ka jingbuaid kiad kaba pynshlur ia ki ban leh ia ka ne ka kam sniew ong u samla Rymbai.
Kumta na ka liang ka seng ka la kyrpad ia ki rangbah shnong bapher bapher jong kane ka thain ba kin ia trei lang bad seng khnang ioh wan rah ia ka bha ka mait jong ka ne ka thain bad kum juh ruh ka shong suk shong sain namar kumba long mynta hi ka mih ki kam awria, kam pyniap bad kiwei kiwei dei tang na ka daw jong ka kiad, kyntu ia ki bor shnong bad ki bor jong ka ain ba kin wan shakhmat ban iatrei lang khnang ban gin lah ban wanrah ka jingkylla hapoh ka ne ka thain pynkut u kyrwoh na ka seng.(SP News)
