Nongstoin, Jymmang 02: Ha ka jingkhih win jong ka lyeriong ha ki saw tylli ki shnong kiba don ha rum Nongstoin ka la wanrah ia ka jingduh kaba khraw na ka bynta jong ki paidbah ha kaba kawei ka mynsiem briew ka la duh ei bad 28 ngut kiwei pat ki la mynsaw bad da ki bun phew tylli ki long iing ki la duh bad julor.
U Bah L G Nongsiej MDC jong kane ka jaka haba kren ha u SP News Agency u la iathuh ba kane ka jingjia ka la jia ha ka por ar baje dang step phyrngap mynta ka sngi ha ka por ba ki paidbah ki dang don hapdeng ka jingioh thiah lyngngai hynrei kane ka lyer kynsan ka la wan bad rat ia ki iing ki sem.
Ki shnong kiba la shah ktah palat ki long saw tylli ka Mawkhniang, ka Mawsiej, ka Mawsiangbah bad ka Nongkdait. Ha kane ka jingjia u Bah Nanly Khardewsaw jong ka shnong Mawsiej u la duh ei ia la ka jong ka jingim, katba kiba mynsaw baroh na kitei ki saw tylli ki shnong ki la poi sha ka 28 ngut.
Haba ia dei bad ki iing kiba la shah pynjulor la ong ba na ka liang jong ki briew ba dei peit ia ki bor jong ka District Adminstration ki dang pynlong ia ka jingjurip ban ong katno tylli ym pat lah ban ong tang da ki phew tylli ki iing ki la shah pynjulor ha kane ka jingjia ba wan lynshop ka mariang.
Na ka liang jong u Additional Deputy Commissioner jong ka West Khasi Hills u Bah J P Lakiang haba kren ha u SP News Agency u la iathuh ba baroh ki iing kiba la shah pynjulor ki long 83 tylli, ki, shnong kiba la shah ktah ki long ka Umjaru, Mawrap- Mawlangniang, Nongkdiat, Mawsiangbah, Mawsiaj and Mawkhniang.
Naka liang jong ka sorkar ka la buh ia ka jaka sah ba shipor ia ki briew ha ka shnong Mawsiangbah bad Nongkhniang, ha ka jingshisha ki la kwah ban buh sa kawei ha Mawsiej hynrei ki bor shnong kim shym la ai jingbit. La iathuh ba ha kane ka jingjia u wei u briew u la iap, saw ngut kiba mynsaw jur la rah sha Shillong katba kiwei pat la phah sumar ha hospital Nongstoin.(SP News)
