Shillong, Jymmang 03: Mynta ka sngi ka jingjur jong u phria ha Ri Bhoi District ka la wanrah ia ka jingjulor kaba jur ha ka rep ka riang bad kane ka la wan pynbut ar sngi lynter kum ha ka shnong Nongthymmai, Raid Madan Kyrdem, ha kaba kawei ka mynsiem briew kala duh ei.
Kiwei ki shnong kiba la shah ktah ha kane ka jinghap jong u phria ka long kum ka Umden Arka bad ka thain Umden baroh kawei, kiba don hajan ka jaka hiar liengsuiñ, Umroi, ki la mad ia kane kajuh ka jingjia hap phria, kaba la jia ha ka por 3 baje ei ei, ha
kaba bun tylli ki lyngkha rep jong ki paidbah nongshong shnong ki la
mad ia kane ka apot lynshop jong ki bor mariang.
Nalor kitei ki shnong kiba hap ha ka Umroi Constituency, sa ar tylli ki jingjia jynrat ka eriong ha ki ar tylli ki shnong ka Umsning Constituency bad ka Mawhati Constituency, ba kynthup ia ka Umsaitsning-Umsmu bad ka Shnong Thad.
Ha Umsaitsning-Umsmu, kawei ka ïingmane jong ka Balang Presbyterian kaba don ha katei ka shnong ka la shah lynshop jem ha ki bor ka eriong, kaba la jia ha ka por 3 ne 4 baje janmiet jong kane ka Sngi Saitjaiñ, haba ka eriong ia kaba la ngeit ba ka dei ka bor u Kyllang, ka la wan lynshop tyngeh ia katei ka jaka mane Blei ki kristan bad ka
la julor bun.
Ha kajuh ka por, nalor katei ka ïingmane, sa kawei ka jaka pule ne ka ïingskul kaba don ha katei kajuh ka shnong ka la shah pynjulor ha ki bor ka mariang.
Ha kajuh ka jingjia, u Kyllang ba jur bha u la lynshop sa ia kawei pat ka ïing kaba don ha ka shnong Thad, kaba hap ha ka Mawhati Constituency, ia kaba la long trai da u Bah Teibok Rangtong, kaba la jia ha ka por 3 ne 4 baje ei ei janmiet.
Na ka liang u Rangbah Shnong ka shnong Thad, u Bah C Shadap, u la kyrpad ia ki bor sorkar ba kin sngewbha ban noh jingiarap sha kane ka longïing kaba la mad arsien ia kane kajuh ka jingjia, ha kaba u la pynkynmaw ruh ba ki bor sorkar kim pat shym la lah satia kat haduh kine ki sngi ban noh synñiang sha ki lanot Kyllang jong u snem ba la
lah, kaba la lynshop biang sa shisien mynta ka sngi.(SP News)
