Shillong, Risaw 31: Nalor kiwei kiwei ki lad jingiada, ki Hima Khasi States ruh ki don ki Riti Dustur (customary practices) kiba kyrpang bad ki kyndon(Rule) kiba dang lah ban nang pynkhlain ban iada ia ka jaidbynriew Hynniewtrep lada ki bor KHADC, JHADC bad GHADC ki shim khia ban wanrah kloi ia ki Act bad ki Rule jong ki 54 Hima /Elaka sha Khasi Hills bad sha ki 18 Elaka Dolloi bad kawei ka Sirdarship ha Jaintia Hills bad ha ki jaka synshar ki 1400 tam ki Nokma ha Ri Lum Garo Hills.
Kum ban shu pynkynmaw ba ki bor KHADC hadien ba ki la mynjur bad pynjari ia ki Ain ki Rule, ki phah pat sha ka tnad District Council Affairs Dept, Sorkar Meghalaya, bad hadien ka jingpeit bad jingbishar bniah, na baroh ki liang ka Sorkar Meghalaya, ki phah ban ioh ka jingmynjur jong u Lat ka Jylla Meghalaya, bad ha katei ka lynti thaw ain la mynjur da u Lat ka Jylla ia ka ‘The Administration of Nongstoin Syiemship Rules 2006 kaba treikam ha baroh kawei ka Hima Nongstoin’.
Ia kitei ki kyndon bad ki Rule 2006, la thaw katkum ki kyndon Section 13 jong ka KHAD( Nomination and Election of the Syiem, Deputy Syiem and Electors of Nongstoin Syiemship ) Act 2003.
“Ngi pynsngew hangne ba katkum kitei ki kyndon Rule ‘The Administration of Nongstoin Syiemship Rules 2006 Section 8 clause (a) & (b) jong kane ka Rule Hima Nongstoin la thoh shai ‘ (a) A Dkhar shall have no right to settle or cultivate in any part or village within the Syiemship. (b) A Dkhar shall have no right to become the member of the Executive Dorbar or Village Dorbar within any village of the Syiemship”.
Ka Hima Nongstoin ha kane ka liang ka la long ka Hima kaba nyngkong napdeng ki 54 Hima/Elaka ban ioh ia la ki jong ki Rule kiba lah ban iada jaidbynriew.
Kumjuh dang shen ka Hima Maharam katkum ka Section 9 jong ka KHAD (Nomination and Eleciton of the Syiem, Deputy Syiem, and Electors of Hima Maharam) Act 2006, ki la thaw ia ka kyndon Rule kaba kyrteng ‘The Maharam Syiemship (Administration) Rules 2009 bad katkum katei ka Rule jong ka Hima Maharam la thoh shai ha ka Section 10 clause (6) ‘Non-Tribals are not allowed to permanently settle within any area under the territorial jurisdiction of Maharam Syiemship without valid document issued by the Syiem and Dorbar.’
Kaba donkam ka long ia ki baroh lai tylli ki bor District Council bad ki bor Sorkar Jylla ba kin ia pyrkhat kumno ban nang pynjanai nang pynkhlain ia ki rukom treikam ia kitei ki Act bad ki Rule Hima kiba la dep pynjari, ba don lypa bad kiba la dep pyntreikam.
Haba pule ia kitei ki Ain ki Rule lada pynmih ia ki Ain, ki Rule katkum ka paragraph 11 ka Sixth Schedule, ngi iohi shai ba ki Ain ki Rule ki lah ban iada ia ki Hima /Elaka kumta ngi kyrpad jur ia baroh lai tylli ki bor Autonomous District Council ban khmih kyrpang ban pyndep kyrkieh ia ki Act ki Rule jong baroh ki 54 Hima /Elaka sha Khasi Hills bad sha ki 18 Elaka Dolloi bad kawei ka Sirdarship ha Jaintia Hills bad ha ki jaka synshar ki 1400 tam ki Nokma ha Ri Lum Garo Hills.(SP News)
