New Delhi Jymmang 17: Ka sorkar pdeng kan ai ka jinghikai kaba kyrpang ia ki ASHA kiba trei ha ki shnong ki thaw na ka bynta ban ia rap ha ka jingaijingsumar ha ka liang ka koit ka khiah. Mynta ka sorkar kan ai jinghikai kaba kyrpang na ka bynta 23 sngi ha ki san bynta.
Kane ka jinghikai kaba yn ai ia ki ka long kaba kongsan haduh katta katta namar ki dei ki nongiarap ia ki briew ha ki shnong ki thaw ban pynpoi ia ki ba pang ba shitom sha ki jaka ai jingsumar khamtam ia ki long kmie kiba la dei ban kha khunlung.
Ia ka jinglut jingsep baroh yn bei da ka sorkar pdeng na ka bynta kane ka jinghikai kaba kyrpang ia ki nongtrei ASHA. Ia kane ka pisa la ai da ka sorkar pdeng sha ki sorkar jylla ia kaba la tip kum ka Financial Envelop. Ha kine ki nongtrei la ai lang ha ki ruh ia ki dawai ban ai sha ki paidbah ba kin long ki lad jingiada katba yn da pynpoi ia ki sha ki jaka ai jingsumar.
Ka thong jong ka National Rural Health Mission ka long ban ai sha baroh ki shnong ha kane ka jylla da ki briew kiba la ioh jinghikai kyrpang ha ki lad jingai jingsumar namar dei ma ki ban ialam ia ki briew sha ki jaka ai jingsumar.
Kumba ka long mynta ki nongtrei ia kane ka kam ASHA ki long tang ki nongtrei mon sngewbha bad ka jingsiew ia ki ka long katkum ka jingtreika jog ki kam don ka jingsiew kaba long thik kaba thkna. Ha kane ka Ri India baroh kawei ki don haduh 8.85 lak ngut bad na kine 7.99 lak ngut ki ASHA ki don ia ki kot sam dawai.(SP News)
