Jowai Naitung 07: Ki Dorbar Shnong kim dei shuh ban beh lane tait shnong bad ki Dorbar ki dei ban lum Dorbar kut snem man ka snem ki bor KHADC bad JHADC ki dei ban pynskhem pynjanai ia kitei ki Riti ki Dustur.
Ka jingialang ka Synjuk Rangbah Shnong, East Jaintia Hills District, ka la ia kynduh ha ka 6 tarik (sngi siatjain) ha iing club Khliehriat (East) ban ia kren halor ka Village Administration Bill bad halor ka jingpynbeit thymmai bad jingpynkylla (amendment) ia ka Sixth Schedule, ia katei ka jingialang la pyniaid da i Tbn. Bah Crosslin Rymbai, President, Synjuk Nongsynshar Shnong, East Jaintia Hills District.
Ha katei ka jingialang, Ka Synjuk Rangbah Shnong, East Jaintia, ka la khot sngewbha ia u Bah John F Kharshiing, Co-Chairman, Meghalaya State Planning Board, Chairman, The Grand Council of Chiefs of Meghalaya, bad Spokesperson, Federation of Khasi States, ba un iarap pynshai halor kitei ki AIN Shnnong kiba thymmai kiban sa pynjari hashen da ki bor KHADC bad khlem artatien ki bor JHADC ki lah ban pynjari ia ki Ain kiba syriem.
Na la liang u Bah John F Kharshiing, Chairman, The Grand Council of Chiefs of Meghalaya, u la ong ba ka por ka dawa ia ki Rangbah Shnong ba kin long kiba smat bad kiba peitngor, kiba pule kot pule AIN pule RULE bad ki ba don ka jingkitkhlieh khnang ba ki paidbah kin ioh ia ka synshar, khaddar bad ka bishar kaba biang. U la ong hadien 61 snem khatduh khatwai hashen ngin sa ioh ia ka AIN kaban pynkup bor ia ki Dorbar Shnong, bad Rangbah Shnong, bad u la ai khublei ia ki bor KHADC kiba la khreh ban wanrah ia katei ka AIN Village Administration Bill 2013.
U la pynpaw ba ha katei ka Bill la pynskhem shuh shuh ia ka jing don kam ia ki Dorbar Shnong bad Rangbah Shnong ba kin lum ia ka Dorbar Kut Snem man ka snem ha kaba ki dei ban wanrah ia ka jingkhien jingdiah hakhmat u paidbah man ka snem. U la ong ba ngi dei ban bat skhem ia ka Riti ki Dustur baroh ha kaba ki Dorbar Shnong, Dorbar Raid bad Dorbar Hima/Elaka ki dei ban lum ia ka Dorbar Kut snem man ka snem kaba dei ka lynti ia u khun u hajar ba kin iohsngew ia ka kaiphod kut snem. Ki bor KHADC bad JHADC ki dei ban shim khia ban pynskhem pynkhlain ia kitei ki Riti ki Dustur kyngba ki Ain.
Hynrei u la ong ba ki dang don katto katne ki jing khuslai halor katei ka AIN Shnong, namar hapoh katei ka Bill la tyrwa ruh ba kan don sa kawei ka bor hapoh Shnong kaban tip kum ka Village Development Council(VDC), bad ha kaba la kdew ba dei tang katei ka VDC kaban don bor ban trei ia baroh ki kam pynroi, bad u Bah John F Kharshiing, u la ong ba ia kattei ka jingtyrwa ban thaw ia katei ka VDC dei ban sangeh shwa namar hap ban ia kren sani bha ioh ba ka long pynban kaban pynpait ia ki shnong ki thaw.
U la pynpaw ia ka jingsngewkhia halor ka rukom jied ia u Chairman jong katei ka VDC ha kaba hap jied da ka ‘majority’ katei ka kyntien ka long pyrshah ia ka dustur jong ngi namar ka jingjied ha shnong ka long halor ka nongrim ‘uba ioh ia mon uba bun ba lang’ lane ka mut ‘consensus’ ym dei ‘majority’ namar kane ka mut uba jop la biang ba un tam da shi khnam, u la ong ba ngim juh kham pynlong ka thep vote ban jied ia ki Nongsynshar Shnong, namar ka ialam sha ka jingiapait ia pra.
U Bah John F Kharshiing, u la ong ruh ba ha katei ka Ain Shnong thymmai kin don ruh kyndon jingmana ia ki Rangbah Shnong bad ka Dorbar Shnong ba kin bah khlieh ba kan nym don shuh kano kano ka jing beh shnong lane tait shnong bad ban bahkhlieh ba ka nym don kano kano ka jing ia tharai sniew kaban ialam sha ka jingthang iing. Ki bor Shnong nangne shakhmat kin hap bahkhlieh ia ka suk ka sian hapoh ka Shnong.
U la kyrpad ia ki Rangbah Shnong ba kin leit sha office JHADC ban ioh kopy ia baroh ki AIN khnang ba kin nym sah ha ka umdum, u la ong ba ka por ka dawa kyrkieh ia ki MDC baroh ba ki dei ban leit pynshai ia baroh ki Ain kiba la pynjari da ka District Council, kum ka nuksa baroh ki Rangbah Shnong ki la dei ban pule bad sngewthuh bha ia ka Ain United Khasi & Jaintia Hills Autonomous District (Administration of Justice) Rules 1953, ki la dei ruh ban ia pule bniah ban ioh jingshai halor ka AIN Meghalaya Town & Country Planning Act 1973 kaba dei ka ain kaba batai shaphang kumno ban thaw iing thaw sem, hangno la shah ban buh dukan lane ban plie ia ka iew bad kaba kumno yn thaw bad tei ia ka iing sah. Kine baroh ki Ain ki long kiba donkam ia ki Rangbah Shnong ba kin ia rah hakhmat ki paidbah ba kin tip kin shai halor ki AIN kiba la dep pynjari naduh u snem 1973 da ka Meghalaya Assembly.
U la pynpaw ruh ba ka jingdawa na ka liang ki Khlieh Nongsynshar ban ioh ia ka Council kaba khlem liang kaba khlem party ka iaid khlem sangeh bad mynta la sdang paw ki dak ki shin ha kaba ka Sorkar India ka ap ia ka shithi bad ka rai na ka Sorkar Meghalaya. U la pynkynmaw teng ba ka Sorkar NDA ka la tyrwa mar san ngut ki Syiem, Doloi bad Nokma ba kin long ki dkhot hapoh ki ADC hynrei ki la kyntait namar ki ADC kumba long mynta ki long kiba don liang bad kiba don party.
U la pynpaw ia ka jingsngew bynniaw ba ha Jaintia Hills haduh kine ki sngi baroh ki 18 Elaka Dolloi bad kawei ka Elaka Sirdarship kim pat don kano kano ka Act lane ka Rule ba la pynjari bad thaw da ki bor JHADC kum ba la pynkup bor ia ka ADC ban thaw bad pynjari ia ki Ain katkum ka para 3 bad para 11 jong ka Sixth Schedule jong ka Constitution ka Ri India
U Bah John F Kharshiing, u la ong ba ka por ka dawa ban ioh ia ka AIN Synshar Dorbar Shnong, Raij bad Dorbar Hima kaba shai khnang ba ki bor Sorkar kin ithuh ia ka iktiar, ka kyrdan jong ki Nongsynshar naduh Shnong haduh Hima. Bad ha kata ka jingpynkup bor ka wan ruh ka jingkitkhlieh lane ka jingbahkhlieh ha kaba ki Rangbah Shnong bad kiwei kiwei ki Khlieh Nongsynshar kin don ki AIN ki KYNDON (RULE) kiba shai ha kaba synshar bad bishar Shnong, Raij ne Hima. Ki kam ki long kiba khia bad ka kam ka dawa ia baroh ki Dorbar Shnong ha kane ka Ri Hynniewtrep ba kin shim khia ban ia pule bniah ia ki ain ki kyndon kiba la pynkhreh da ki bor KHADC, bad ia kaba khlem artatien ki bor Jaintia Hills Autonomous District Council (JHADC) kin sa pynbud bad pynjari ia ka juh ka AIN.
Kiba bun ki Rangbah Shnong, ki la pynpaw ia ka jingkyndit halor katei ka Bill bad ki la kyrpad ia u Bah John F Kharshiing, Chairman, ka Dorbar ban pynlong ka jingbuddien bad ki bor JHADC bad ban kyntu ia u CEM JHADC bad ki MDC Jaintia Hills ban lum ia ka jingialang ki Rangbah Shnong, ki Dolloi khnang ba ki AIN kin long kiba ia dei dur bad ka rukom im ha Jaintia hills.
Hadein ka jingiatai kaba sani bha u Bah John F Kharshiing, Chairman, Ka Dorbar Ki Khlieh Nongsynshar Ka Ri Hynniewtrep, u la pdiang ia ka jingtyrwa ban long kum u nongaibuit (adviser) ia ka Synjuk Nongsynshar Shnong East Jaintia Hills District.
U Bah John F Kharshiing, Chairman, u la khot sngewbha ia ki Rangbah Shnong ban ia pyllait por khnang ban ia poi sha ka jingialang kaban long ha ka 13 August 2013 ha Khasi National Dorbar Hall, Mawkhar, Shillong naduh por 11 baje mynstep ban kynmaw ka jingdaw 65 snem ka jing sah teng ki jingiateh bad ki jingkular, ba la mynjur bad pdiang da ka Sorkar India bad ki Khasi States ha ka 17 August 1948.
Kiba la ia kren bad kiba la ia don lang ki long u Bah Pdianghun Dkhar, General Secretary, SKSSJHD, ki Rangbah Shnong, ki riew rangbah na jan baroh ki Elaka Rymbai, Sutnga, Narpuh, Lakadong, Amwi, Nongkhlieh, Saipung, Jowai, kynthup ia u ki nongialam jong ki seng bhalang, ha ryngkat u President JSU Narpuh Circle, President JYF, Saipung Circle. na ka thain East Jaintia Hills District.(SP News)
