Shillong November 30: Ki briew kiba nabar kim da tip than eh ia ka dong shatei lam mih ngi jong ka Ri India, khamtam eh ia ka jylla Meghalaya la ong ka myntri ba deipeit ia ki kam pynroi sor ka kong Ampareen Lyngdoh.
Haba kren ha ka jingialang jong ka Rajiv Gandhi National Institute of Youth Development (RGNIYD) da ka jingiatrei lang bad ka NSS Regional Centre Guwahati bad Meghalaya. Ka la ong ba bun na ki briew kiba na bar ki don ka jingsngewthuh ba kala ia kane ka thain baroh kawei bad kane ka la pynia jngai ia ka jingiadei hapdeng kiwei ki bynta jong ka Ri India.
Ka la ong ba ki briew ha kane ka thain ki long kiba ieit ia ka jingsuk bad ki bym don kano kano ka jingsngewpher jaid ne kynja. Ia kane ki dkhot jong ka NSS kiba la ia poi sha kane ka jingialang ki lah ban sngewthuh hi na kane ka jingsah ka jong ki mynta.
Ka kong Ampareen ka la kyntu ia ki dkhot jong kane ka NSS ba kin long ki nong tbeh sharak ia kane ka jingsuk kaba ka jylla Meghalaya ka don bad ia ka dong shatei lam mih ngi jong ka Ri India.
Ha ka jingkren jong u Dr Shekhar u ba pyniaid ia ka RGNIYD u la ong ba ka thong ka jong ki ka long ban pynliet jingmud ha kaba ia dei bad ka North East ban pynsngewthuh ia ki briew ia ka jinglong bha jong kane ka thain bad ban weng na ki briew ia kane ka jingsngewthuh bakla.(SP News)
