Jowai, Jymmang 28: Ki Autonomous District Council ki dei kiba la pynkupbor da ka riti synshar ban pynneh pynsah iaka ka dustur ka riti, pynban katkum ka khubor kaba la iohlum ka Jaintia Hills Autonomous District Council kala pynkhein iaka kyndon kaba ia dei bad ka kam thung iaki khlieh nongsynshar kaba kynthup iaki Daloi.
Katkum ka khubor bala iohlum ki don haduh lai tylli ki eleka kiba ym don daloi mynta naka daw ba ki daloi barim kila khlad noh, hynrei ka District Council haduh mynta kam pat lah ban thung iaki daloi ne ban thung da ki daloi ba shusieh ha kine ki lai tylli ki eleka. Ki lai tylli ki eleka kiba ym don daloi ki dei ka eleka Rymbai, ka eleka Nongjngi bad ka eleka Satpator.
Ka shuki daloi haka eleka Satpator kala thylli naduh ka 28 tarik u bnai Nohprah 2012, ka eleka Nongjngi kala thylli naduh ka 25 tarik u bnai Nailar 2013 bad ka eleka Rymbai kala duh noh ia u daloi naduh ka 25 tarik u Lber 2014.
Ha kaba ia dei bad kine ki eleka ba thylli, naka liang ka EC kala thung ia u daloi ba shusieh (acting) haka eleka Satpator katba iaki artylli ki eleka pat ka Rymbai bad ka Nongjngi ka EC kam shym la thung daloi haka jaka jong kiba la khlad noh kumta ka shu bat iaka kam da ka Administrative Officer JHADC ka kong B. Bamon. Ha kaba ia dei bad kane naka liang jong ki riewpawkhmat kila pynpaw iaka jingsngewphylla ba kumno da ka kynthei kan bat iaka kam daloi kaba long pyrshah iaka dustur.
Haka jingshisha ki kynthei kim donhok wat tang ban iashim bynta ruh haka kam jied daloi, pynban kane ka EC kala pynlong Daloi da ka kynthei.
Kumjuh ruh naka liang jong ka JHADC haduh mynta ruh kam pat lah ban rai iaka kam daloi haka eleka Nongkhlieh kaba la sahteng bun bun snem. Haka eleka Nongkhlieh ka EC kala shu thung da u daloi ba shusien naka daw bala suspon ia u daloi bala jied da u paidbah.
Ka kam thung bad jied daloi hapoh ka District Council ka long kaba sahteng bad kaba kynrum kynram bad ka buh ia u paidbah haka jingeh khamtam ia kito ki eleka kiba EC kam pat lah ban thung wat tang da u acting daloi.
Naka liang jong ki nongthoh khubor kila pyrshang ban iakynduh ia u CEM JHADC u ma Thongbor Shiwat uba bat ruh iaka tnat Political Affairs khang ban ioh jingshai halor kane ka phang, hynrei naka liang jong u CEM um shem la ai kano kano ka khubor.(SP News)
