Shillong, Nailar 20: U myntri rangbah ka jylla u Dr Mukul Sangma 
u ba la ialam mynta ka sngi ban shim ia ka jingsmai ban wanrah ia ka jingiatylli hapoh jong ka Ri, u la ong ba ki don ki seng sain pyrthei bad ki seng bhalang kiba kwah ban wanrah ia ka jingsngewpher hapdeng ki jaidbynriew.
Ha kane ka sngi ban rakhe ia ka jingiatylli ha ka Ri Baroh kawei kaba ia dei ryngkaht ruh bad ka sngi kha jong u myntri rangbahduh jong ka Ri India u ba la khlad noh u Rajiv Gandhi la pynlong mynta ka sngi ha phyllaw jong ka mian secretariat. U myntri u khot u wer ba to ha kane ka sngi yn ia shim ia ka rai ban wanrah ia ka jingiatylli kawei hapoh jong ka ri ban wanrah ka jingshong suk kane ka long kaba don kam.
Ha kane ka sngi u myntri rangbah u la pynkynmaw ruh ia ki kam kiba khraw kiba la leh da u myntri rangbah duh jong ka Ri bad kaei kaba la leh ha katei ka por ka la wanrah ia u soh u ba ka pateng mynta ka la ioh ban kheit. U la ong ba dei ha ka por jong u Rajiv ba ia ka rta thep vote la pynhiar na ka 21 snem sha ka 18 snem, dei ha ka por jong u ba la wanrah ia ka jingai bor ia ki kynthei bad dei ma u ba la wanrah ia ka pancahyati raj ba ka jingsynshar ka la long ha ki ki shnong ki thaw.
Ki briew kiba don ha kane ka kyrdan ban ai ka jingshakri sha ki paidbah to yn ia shim ia ka rai ban trei ha la ka jong ka jong ka bor ban pynneh pynsah ia ka jingiatylli kawei bad ka shong suk shong sain ha ka ri baroh kawei
Kiwei ki heh sorkar kiba la ia don lang ha kane ka sngi ki long u Dr RC Laoo Deputy Chief Minister, kong Roshan Warjri Home minister bah HDR Lyngdoh myntri GAD u bah Kennedy Khyriam parliamentary Secretary bad ki ophishar sorkar naduh u Chief Secretary bad kiwei kiwei kiba la don lang ha kane ka sngi ban shim ia ka jingsmai wan wan rah ia kajingiatylli ha ka Ri. (SP News)
