Shillong, Jymmang 10: Ka National Green Tribunal Act 2010 bad ka Meghalaya ka long pyrshah ia ki jingiateh ba ki jingkular ( Instrument of Accession and Annexed Agreement 1948 ba la mynjur da ka Sorkar India bad ki Hima Khasi States
Ka Dorbar Ki Khlieh Nongsynshar Ka Ri Hynniewtrep, kaba la long ha ka 9 tarik 2014, ha office Dorbar ha Demthring, Shillong, ka la ioh pdiang ia ka copy shithi kaba 6 tarik January 2014, na ka office u Chairman, National Commission for Schedule Tribes, kaba la thoh sha u Union Home Minister, Sorkar India, ban kyntu ia u ban pyndep ia ki jingkular kiba la ia kut lyngba ki dulir ki jingiateh bad ki jingkular (Instrument of Accession and Annexed Agreement 1948) ba la mynjur ka Ri India bad ki Hima Khasi States. La pyniaid ia ka dorbar da u Bah John F Kharshiing, Chairman. Ka Dorbar.
Shuh shuh, ka Dorbar ka pynpaw ia ka jingsngewkhia bad ka jingpyrshah halor ki Ain kiba mih na Parliament na ka por sha ka por kiba long pyrshah ia ki jingiateh bad ki jingkular. Ki la ia kren kumno ba ki Act ki Rule jong ka Parliament kim trei kam hapoh ka jylla Jammu & Kashmir namar ka IOA jong ka jylla J&K ka paw hapoh ka Article 370 ha ka Constitution Ri India. Ki Act ki Rule ka Parliament ki treikam tad ynda la mynjur ka Assembly jong ka jylla J&K.
Katkum ki nongrim jong ka IOA & AA, ki Ain ki hukum ba mih na Ka National Green Tribunal Act 2010, bad ki kyndon kiba bun ki long pyrshah ia ka dulir ki jingiateh bad ki jingkular (Instrument of Accession and Annexed Agreement 1948) ba la mynjur ka Ri India bad ki Hima Khasi States, ha ka 17 August 1948 bad kaba kongsan ka long ba ka ktah ia ka hok long trai halor ka khyndew ka shiap hapoh ka bri u Hynniewtrep.
Ka Dorbar Ki Khlieh Nongsynshar ki sngewdei ban kyntu ia baroh ki Dorbar Shnong, ki Dorbar Raid bad ki Dorbar Hima ba kin pynkylla Khasi ia kitei ki hukum, ki Act, ki Rule kynthup ia ka ‘ The Mines and Minerals (Development and Regulation ) Act 1957, Ka The Mines Act 1952, The Mines Rules 1955, Ka The Meghalaya Mines and Minerals Policy, 2012 ban sngewthuh ia kitei ki jingtuklar halor ka khyndew ka shiap, namar kam ktah tang ia uba tih maw ka ktah ia baroh ki ‘trai khyndew’.
Kumba ka long mynta kitei ki Act ki Rule baroh ki long tang na ka bynta ki Company kiba heh, bad ki pynduh lad ia ki trai khyndew kiba rit.
Ha ka juh ka por ka Dorbar ki Khlieh Nongsynshar ka kyntu jur ia ki Dorbar Shnong, Dorbar Raid bad Dorbar Hima ban lum dorbar ban pyrkhat thymmai halor ka rukom trei ia kine ki kam khnang ba kan nym long kaba ktah ia ki longdien.
Ka Dorbar ki Khlieh Nongsynshar Ka Ri Hynniewtrep, ka la rai ban leit ia kynduh ia u Dr Mukul Sangma, Chief Minister, Meghalaya ban kyntu ba pynpaw ia ka jingpyrshah ia kitei ki ain baroh namar kim dei katkum ka IOA & AA kaba la mynjur da ka Sorkar India, bad ba kim dei ban ktah ia ka hok long trai halor ka khyndew ka shiap.
Ha kajuh ka por ka Dorbar ka la rai ban leit ia kynduh ia baroh ar ki CEM KHADC bad JHADC ban ia kren ia kiba bun ki kam jong ki Hima/Elaka.
Kiba la kren bad kiba ia don lang ha katei ka dorbar ki long u Paiem Dr Balajied S Syiem, Syiem Hima Khyrim, u Paiem PM Syiemlieh, Syiem Hima Nongkhlaw, u Bah H Skhemlon, Sirdar Hima Mawdon, u Bah HL Rynthathiang, Lyngdoh Hima Lyngiong, u Bah RW Syiem, Syiem Mawiang, u Bah W Syiem, Sirdar Elaka Nongpoh, u Bah A Kurbah, Sirdar Elaka Marbisu, u Bah G Mylliemngap, Lyngskor Hima Khyrim, u Bah RL Sohliya, Myntri Hima Mawphlang, bad kiwei kiwei ki myntri, ki Sordar bad ki Rangbah Shnong.(SP News)
