Shillong, Naiwieng 03: U myntri ka tnad khlaw jong ka sorkar jylla u bah Prestone Tynsong haba kren ha ka jingrakhe ia ka jingdap 25 snem jong ka kit khubor u Rupang u la ong ba ki katkhubor ki long ka phangpdeng jong ka jingtrei kam jong ka sorkar namar lyngba jong ki lah ban pyntip sha ki paidbah kane ka long ruh ia ki seng bhlang.
Na ka liang jong u myntri ka sorkar jylla u la ong ba ha kane ka juk kaba mynta lada ym don katkhubor kan long kumno. U la ong ba ki kot khubor ki la shakri shisha ia ka jylla ka ri baroh kawei ha ki bynta ki bapher bapher. Haba ia dei pat bad ka jingong jong u Editor jong ka Rupang u la ong ba ynb sa ia kren bad ka sorkar.
Ha ka jingkren jong u Bah RM Shabong u trai bad u Editor jong kane ka kot khubor Rupang u la ong ba ia kane ka kot khubor la sdang ha u snem 1988 da kaba pynmih shisien shitaiew bad nangta ha u snem 1998 la lah ban pynkylla ia ka sha ka khubor kaba mih man ka sngi.
Da kaba shim kabu ia kane ka jingiakynduh lang na ka liang jong u Bah Shabong u la ong ba ka por ka la dei ba ka sorkar ka dei ban bthah ia ki company bad ki karkhna kiba don ha kane ka jylla ba kin mang pisa ban ai jingpynbna ha ki kot khubor kiba mih na kane ka jylla Meghalaya.
Ha kane ka sngi u la iathuh ruh ia shibun ki jingeh kiba kane ka kot khubor ka la ia kynduh na ka por sha ka por. Ban ia skhilang ia kane ka sngi la don shibun ki riew rangbah bad ki nongtrei ba rim jong kane ka kot khubor.(SP News)
