Shillong, Risaw 22: U President jong ka Ri India u ba u iohi ba ha kane ka 
skul Bah North Eastern Hills University ki kynthei ki kham leh bha ha ka jingpule, ia kane u la ong ha ka jingialang ban ai ia ki degree sha ki samla pule jong ka convocation kaba XXI.
Haba kren halor ka pule puthi ha ka Ri, u la ong ba kane ka dong ka thian shatei lam mih ngi jong ka Ri India don kam ban dang pynkhlian shuh. Kumba ka long mynta ia ka jinglong jingman jong ki rit paid kane ka thain ym pat lah ban pyndon kam ha ka rukom kaba dei.
Haba kren pat ia ka jingiathew ia ka kyrdan jong ki skul bah ha pyrthei na ka liang jong u president u la ong ba na ki skul bah ha ka pyrthei ki don 200 tylli kiba paw hynrei ka Ri India kam don wat tang kawei ruh ban rung ha katei ka thup.
La ong ba ka sorkar pdeng ka la bei pisa shibun na ka bynta ban pynbha bad pyniar shuh shuh ia ki skul bah ha kane ka ri, hapdeng kane ka jingpyniar ka dei ban iaid ruh ryngkat ryngkat bad ka jingpynbha ia ka jingpule, u la ong ba ha ka jingshem ka jong u ka long ba ki skul bah ha India kim don ia kata ka jingpynbha.
Na ka liang jong u president u la ong ba dei ban pynshlur ia ki kam wad bniah ban kyntiew ia ka roi ka par bad u la ong ba bun na ki samla kiba stad jong ka Ri ki leit sha bar namar hangne kam don ka lad.
Ha ka juh ka por na ka liang jong u president u la pynkynmaw ia ki paidbah jong kane ka Ri ba wat ki skul bah kiba pawnam tam ha ka pyrthei kum ka Cambridge bad Oxford universities ym dei ban bei pisa ka sorkar hyhnrei dei na ka jingnoh syniang jong ki riew paidbah. U la ong ia ki samla kiba la pass na kane ka skul bah ba kin dei ban klet ha ki sngi ban wan.
Ka jingkren jong u lat ka jylla u Dr K K Paul u la ong ba ka jingnang jingstad kaba u briew u ioh ka dei ban long ba kan lah ban pynim ia u. U la ong ba naduh kiba por ba ka Ri India kam pat ioh ia ka jinglait luid ka Shillong ka dei ka pdeng jong ka jingnang jingstad bad ka dang neh haduh mynta.
Ha kane ka Convocation kaba long mynta ka sngi kiba la ioh ia ki degree jong ki baroh ki long 8364 ngut, ha ka kyrdan Phd 114 ngut, Mphil 20 ngut, PG Degrees 950 ngut, Bachelor’s degrees 7280. (SP News)
