Shillong, Rymphang 02: Hadien jong ka Free Medical Eye Camp bad Ai Kam Program ba la pynbeit da Ka Meghalaya Newspaper Hawker & Vendor Association (MNH&VA) ryngkat ka jingiatreilang bad Ka Mission Trust bad Bawri Nethralaya hapoh ka jingpeit jong I Dr S P Saikia bad Dr (Ms) V Surong bad ba la wan ban ia shim bynta lang da I Kong Theilin Phanbuh Chairperson Ka Meghalaya State Commission for Women kum ka Kongsan, ki nongdie kotkhubor ki la ioh ka lad ban iuh kjat sa ha Ka Don Bosco Museum ryngkat lang bad U Commandant Ka North Eastern Security Academy (NESA), Mawlai Mawkynroh Shillong.
Ha shwa ban rung shapoh Ka Museum kaba pawnam bha wat ha ka pythei baroh kawei, hangne U Commandant ka NESA ryngkat bad kiwei pat ki jingtip ba la iasam halor Ka 100 % Free Linked Training on Skill Programme kum na ka NIPSTEC, IL&FS, iLEAD, ETPL, DB Tech, Directorate of Employment & Craftsmen Training bad kiwei kiwei de, u Chairman NESA u la ban jur ba dei ban long kiba trei minot bad trei shitom khlem da pynsepei ia la ka por ba Kordor ba U Blei Nongbuh Nongthaw U la ai lang kumjuh bad khlem duna iano iano ruh namar don bun ki lad ki lynti mynta ba la plie wat ia ki khynnah naduh kiba la pass klass V shaneng, khamtam ia kito kiba la ieh noh ia ka jingpule na ki daw bah ki bym lah kiar .
Ha ka jingkren jong u, u la ban ruh ba kine Ki Skill Training Institutes ki kham ailad ruh ia kito kiba wan shwa na ka long iing longsem kiba kham duna ka jingioh jingkot bad khamtam ia ki nongkyndong ha kaba kim donkam ban siew shi pisa la ka dei ha ka bam bad jaka sah lada ki mih noh na la shnong ban wan ban shah hikai ha ki Skill Development Training Institutes ba bun jait bad ban ioh pat ia ka kam khlem da donkam ban wad shuh da ka jingiarap kita ki Programme Implementing Agency (PIA) lane Vocational Training Centre (VTC) ba la ithuh da ka Sorkar Pdeng bad Sorkar Jylla kiba don ha ka jylla jongngi bad wat shabar ruh kumjuh.
La pdiang burom ia kiba la wan sha kane ka jingleit jngoh kai ia ka Museum da u Bah Eklansis Sohshang General Secretary MNH&VA uba la ai ka khublei khamtam ia U Chairman NESA uba la kloi ban ai ei ban pule ia Ka Computer Course bapher bapher kaba 3 bnai na ka bynta ki kino kino ki nongdie kotkhubor ba kwah ban pule computer. U Bah Larry P Warjri uba long ruh u Founding Adviser MNH&VA, u la pynkynmaw ba don shibun ki nongdie kotkhubor kiba la wanrah burom ym tang ia ka seng nongdie kotkhubor, hynrei ia ka iing ka sem ka jong ki bad ia ka shnong ha kaba la kha bad shong bad sah mynta.
U Bah Warjri u la pynkynmaw ruh shaphang I Bahrit Devin Kharsyntiew bad ia ka jinglong jingim bad ka thong ba ki 4 ngut ki President jong ka MNH&VA ki la poi mynta ha ki kam kiba khraw wat la ki long tang ki nongdie kotkhubor mynshwa. U president uba nyngkong u la long mynta u Pastor ha ka Balang KJP Synod Sepngi, uba ar pat un ialeh election MDC 2014 bad uba la leh shibun ki kam ban pynbha ia ka kam die kotkhubor bad uba la long ruh u nongthoh kotkhubor ba pawkhmat bad ithuh da ka sorkar jylla ha kaba u la lah ruh wat ban pynmih la ka jong ka kotkhubor Weekly Employment News Ka Kyrsiew, u president uba lai u la pass MA Geography bad mynta pat uwei na ki nongiasaid ain ba pawkhmat ka jylla.
Kaba kham sngewtynnat ka long shaphang uba saw, u la trei shwa da ka kam kitnong daju kumba 3 snem. Nangta u la sdang ka die korkhubor bd pyntbit bha ialade ha ka Kam Music Instructor bad kumta u lalong uwei na ki Nonghikai Music uba pawnam bha ha sor bad sha nongkyndong ruh. Da ka jingtrei shitom bad minot khlem da pyn sepei ia la ka por u la ioh kam sorkar mynta hangne ha sor shillong. (SP News)
