Shillong, August 14: U myntri rangbah ka jylla u Dr. Mukul Sangma, mynta ka sngu 
u la plie ia ka jingrakhe ia ka jingdap 50 snem jong ka skul Synod Higher Secondary School, Shillong ha kaba la rakhe ia ka jubilee ksiar jong ka mynta ka sngi.
H aka jingkren jong u Dr Sangma u la ai ka jingiaroh ia kane ka ksul kaba la lah ban ieng haduh kine ki sngi bad ia ki kam kiba kane ka skul ka la leh bad khamtam eh ia ka nongseng ka Miss Gwen Catherine Evans kaba la iohi jngai ia ka jingdon kam ki paidbah ha katei ka por.
Ha ka juh ka por u myntri rangbah ka jylla u la kyntu ia ki nonghikai ba ki dei ban shim ia kane ka kam hikai kum ka thong ka jong ki ka mission bad kam dei ban long tang kum ka kam. U la kyntu ia ki nonghikai ba ki dei ban sian dur iala lawei jong ki khynnah ba kin don ia ka mynsiem jingkit khlieh.
Na ka liang jong u myntri rangbah u la ong ba ka skul ka lah ban shim kabu ia ki lad ki lynti kiba ka sorkar ka don ban ai na ka bynta ban ai ka jinghikai ia ki khynnah. Ha ka juh ka por u la ong ba ki nonghikai ki dei ban long kiba sbun bad kiba jem nud.
H aka jingkren jong ka myntri kam poh iing ka jylla ka kong Roshan Warjri ka la iaroh ia kane ka skul ba wat hapdeng ki jingeh kaba ki ia kynduh ka la iaid sha khmat haduh ba kan da poi ha kane ka kyrdan.
Kiwei kiba la ia don lang ha kane ka sngi ki long u Rev. D. R. Sohkhlet, Moderator Khasi Jaintia Presbyterian Assembly (KJPA), Rev. N. S. Phawa, Senior Administrative Secretary KJPA, Rev. P. Dkhar, Moderator K.J.P. Synod Sepngi bad President jong ka skul Managing Committee, Bah W.S. Challam, District School Education Officer, kong . D. R. Shullai, Principal Synod Higher Secondary School, lem bad ki kmie ki kpa jong ki khynnah.Ha kane ka sngi u Dr Sangma u la plie ruh ia ka shnat pule commerce hapoh kane ka ksul.(SP News)
