Shillong,Naiwieng,16:Ia ka national press day “ Ka sngi ki nognthoh khubor” la rakhe ha kane ka 
Ri India baroh kawei bad ha Meghalaya ia kane ka jingrakhe la pynlong ha Shillong Club bad ka phang pdeng jong ka jingiakren ka long “ ka bynta jong ki nongthoh khubor ha kaba ia dei bad ki paidbah”.
Haba kren ha kane ka jingialang kum u nongkongsan u shongknor jong ka iing dorbar thawain ka jylla u AT Mandal u la ong ba ki nong thoh khubor ki don ka jingiaka bynta kaba khraw ha kaban sain dur ia ka jingmud jingpyrkhat jong ki paidbah.
U la ong ba ha ka Ri India ka don ia ka jinglah ban kren laitluid ym ban kren laitlan bad ia kane la pynskhem da ka riti synshar jong ka Ri haba ka article kaba 19(1A) jong ka riti synshar ha kaba ki briew ki lah ban pynsngew ia kaei kaba ki don ban ong, hynrei kim dei ban ktah pat ia ka jinglong u ne ka briew shimet.
Ha ka juh ka por na ka liang jong u speaker u la sngew bynniaw ia ka jingkylla ha ki lad pathai khubor ha kine ki sngi haba ki kylla long ki iing ki sem jong ki nongkhaii ha kaba ki nongtrei kim lah ban iaid pyrshah ba tieng ioh duh ia ka lad jingmih. Sa kawei kaba sniew ka long ba ka jingailad ban pynmih ha ki kot khubor ia ki dawai kiba khlem da pynthikna la ki long kiba biang shisha ne em namar kane ka ktah ia ka koit ka khiah jongki paidbah.
La ong ba ha kane ka juk kaba mynta ki lad pathai khubor kim dei shuh tang ki kot khubor hynrei la mih ki khubor lyngba ki telibishon ia kaba la tip kum ki Electronic Media, ki Portal News lyngba ki internet kaba ka pyrethei ka iabeh bha mynta. Ha kane ka jylla Meghalaya ruh ki la don ar tylli, ka www: spnewsagency.com bad ka ohmeghalaya.com ki lad pathai khubor ha kane ka juk mynta ki long kiba sted haduh katta katta.
Na ka liang jong u Deputy Commissioner jong ka East Khasi Hills u Sanjay Goyal ha ka jingkren ka jong u u la ong ba ki nongthoh khubor ki logn ki la ioh ia ka ka lad kaba kyrpang ha kaba ym don ba lah ban khang ia ka jingtrei ka jong ki, katba ki ophisar ki don ia ki kyndon bad ki hap ban iaid katkum kita ki kyndon.
Ki nongthoh khubor ki dei ban don ia ka jingkitkhleih ha kaba ki pynmih ia kano kano ka khubor bad ka khubor kaba ki thoh ka long na ka bynta jong u paidbah ba bun balang. Ha ka juh ka por u la ong ba ki dei ban ailad ruh ha ki lad pathai khubor ia ki kam pynroi kiba ka sorkar ka leh.
Ha kane ka sngi la don ka jignhikai kaba kyrpang ia ki nognthoh khubor da uwei u nognthoh khubor ba la paw na Mumbai bad kane ka jinghikai ka long kumno ban tboh ia ki khubor ha ka por ka saw ka sian bad ha ka suk ka sian ruh kum juh. Ia kane ka jinghikai la ai da Alok Thakur.(SP News)
