Shillong, Rymphang 02: Ka kynhun ki samla pule jong ka jylla Arunachal Pradesh hapoh ka lama jong ka Arunachal Pradesh Student Union (ASUS) kiba pule ha kane ka nongbah Shillong mynta ka sngi kila pynlong ia ka jingiaid paidbah ban pyrshah ia ka jingshah pyniap jong u Nido Tania ha Nongbah Delhi ha ki riew thrang snam.
Da ki spah ngut ki samla pule na katei ka jylla kiba don ha kane ka nongbah Shillong kila ia shim bynta ha kane ka jingiaid paidbah ban pynpaw ia ka jingsngew pyrshah ia kane ka jingshah pyniap jong u paradoh para snam jong ki ha ki riew ha Delhi.
Ki samla pule katei ka jylla ki la ia lum ha Arunachal secretariat ha jan jong ka Anjelee petrol pump bad kila ia iaid paidbah bad pynkut ha Arunachal Bhavan kaba don ha cleave colony. Kane ka jingiaid paidbah ka long na ki surok jongbah jong kane ka nongbah Shillong.
Ha kane ka jingiaid paidbah, ha kawei na ka jingthoh kaba la rah ha kane ka sngi la thoh ba ki “pulit jong ka nongbah Delhi ki dei ki nongpyniap briew” kawei pat ka thoh ba “ Ngi dei ki nong India”.
Ha kane ka jingiaid paidbah la dawa ba ki pulit jong ka nongbah Delhi ki dei ban kem ia ki nongpyniap briew bad ki dawa da jaba ia pyrta ba dei ban pynshitom ia kiba leh ia kane ka kam pyniap briew.
Ia kane ka jingiaid paidbah ia kaba la tip kum ka “ peace rally” la kyrhsan lang da kiwei ki seng samla pule kane ka dong shatei lam mih ngi jong ka Ri India.(SP News)
