New Delhi Jymmang 20: Ki shnong ha ka Ri India baroh kawei kiba la ioh um dih na ka skhim National Rural Drinking Water Programme ki long 5,05,309 tylli. Hynrei ka jingdon jong ki shnong ha ka ri baroh kawei ki long 16,66,075 tylli. Kine ki dei tang ki shnong ha ki nongkyndong.
Katkum ka ko kaiphot haduh ka 1.4.2012 ka pyni ba baroh ki shnong ki la ioh lut ia ka umbam umdih. Na kitei kiba la kdew haneng ki don ki shnong 2,58,241 tylli kiba la ioh ia ka umdih tang ba kam pat long kumba ki dei ban ioh kumba la mang. Ia kine kiba dang sah yn sa lah ban pynioh ia ka Umdih kaba biang ha kane ka snem mang tyngka 2013-2014 bad ka jingmang pisa ka la kot sha ka Rs.1300 klur tyngka.
Ban pynkhuid ia ka um bam umdih kiba don kunja dawai ka sorkar Meghalaya ha u snem 2010-2011 ka la ioh na ka sorkar pdeng 0.66 klur ha u snem 2011-2012 ka la ioh tang 0.02 klur bad ha u snem 2012-2013 ka la ioh 0.32 klur. Kane ka jingbei pisa jong ka sorkar pdeng ka long ban pynkhuid ia ki um khnang ba kin long kiba bit ban dih.
U myntri khynnah ka sorkar pdeng u Bharatsinh Solanki, u ba dei peit ia kane ka tnad sam umbam umdih sha ki nongkyndong u la ong ba ka sorkar ka la ai ia kane ka jingiarap ka long ban pynioh ia ki nongkyndong ia ka umbam umdih kaba khuid ba suba.
Na ka liang jong ka sorkar pdeng ka la ai bor ia ki sorkar jylla ba kin pyntrei kam ia ki skhim katkum ka jinglah ka jong ki bad ka sorkar pdeng ka ai ka jingiarap ha ki liang baroh. Haba ia dei bad bad ki jylla ha NE ka jingbei pisa ka long ha ka ratio kaba 90% na ka sorkar pdeng bad 10% na ki sorkar jylla.(SP News)
