Shillong, Naiwieng 24: Kum kiba kit bad kiba ia noh syniang ia ka koit ka khia
, 35 ngut na ki 13 Shnong Nongrim Nongladap, Umdohthli, Mawbri, Liarbang, Bhoirymbong, Mawiambei, Kyrdem, Umroi Laban, Mawkyrdep, Khlieh-Umstem, Mynri-Umsning, Umket, bad Mawnoh Synrum, kiba dei ha ka kam sumar tynrai bad kiba ai dawai kynbat, kum ki nongpynkhakhun, ki nongkhem, ki ba long ruh ki dkhot ka SPIKAP, kiba ngi juh khot ki Doctor Sla, ban ialeh ia ka jingpang Khieshoh Rih (Malaria), hapoh ka jylla Meghalaya, ki la poi sha ka training awarness program ba la pynbeit da ka Futures Group International India Pvt Ltd, (Caritas-India), ha ryngkat ki bor jong ka tnad ka Koit ka Khia- (Khie Shohrih) -Malaria ( Dept of Health- Malaria) Govt of Meghalaya bad ka Society for Promotion of Indigenous Knowledge and Practices (SPIKAP), naduh por 9.30 mynstep haduh 2 baje janmiet, ha ka 22, tarik Naiwieng (November) 2013, ha Iing Dorbar Hall Bhoirymbong Lumdaitkhla.
Kitei ki nongsumar tynrai, na ka thain Umroi, ki la ioh ia ka jinghikai kaba shisngi halor kumno ban iarap bad ban ai jingmut ia kiba ioh ia kum katei ka jingpang Khieshoh Rih (Malaria) kaba long kawei na ki jingpang kaba ha Ri India dang khien ba ka long kawei na ki ba shyrkhei tam.
Nalor katei ka jinghikai, kitei ki nong sumar tynrai ki la pynpaw ia ka sdang kyrduh jong u kynbat bad ki la kyntu ia ki bor Shnong, Raid bad Hima ban buh kyrpang ia ka jaka ban ioh rep ia ki kynbat kiba kordor jong ka jylla.
Ha katei ka jinghikai nalor ki Doctor na ka tnad ka Koit ka Khia, ki officer jong ka Futures Group International India Pvt. Ltd, bad ka SPIKAP, la ioh jingkren ruh na u Bah John F Kharshiing, Co-Chairman, Meghalaya State Planning Board, bad Chairman, (SPIKAP)Society for Promotion of Indigenous Knowledge and Practices, uba la ai khublei kyrpang ia ki Nongaidawai Kynbat/ Ki Nongkhem/ Ki Nongpynkhakhun kiba la kyrshan ia ka koit ka khia sha ki thain kyndon ha kaba ka jngai ka PHC ne CHC bad khamtam ki la long ka jingkyrkhu namar ka long kaba shitom ia ka Sorkar ban buh Doctor ne ki Nus ha man ka Shnong, bad u la ong ba lyngba katei ka jinghikai ka jingiasyllok training ki paidbah nongshnong sha ki thain kyndon, ki lah ban ioh ka jingbatai kaba bniah bad kaba shai kumno ban leh, bad hangno ban leit lada ki shem ia kum katei ka jingshitom bad haba ka jur katei ka jingshitom namar u kain pyrjong. U la ong ba katei ka program kan nang iaid shakhmat katkum ki program haduh ban da dep ai training ia baroh ki nong sumar tynrai ha kane ka jylla Meghalaya
U Bah John F Kharshiing, Chairman, SPIKAP, u la kyntu ia ki Nongsynshar Dorbar Shnong, Dorbar Raid bad Dorbar Hima ban shim khia ban pynlong ki jingiatai hapoh ki Shnong ki thaw ban ioh lad ban buh ki jaka rep ia ki kynbat dawai kiba kordor namar kaba shyrkhei ka long ioh ba ki duh jait. U la ong ba ki sla kynbat khasi ki dei kiba bha tam ban na pdeng ki dawai.
Kiba la kren bad kiba la ia don lang ki long u Bah Albinus Lyngdoh, dkhot ka Dorbar Raid Umket, bad kiwei.(SP News)
