Shillong Nohprah 06:U Principal Secretary ba dei peit ia ka tnad bording jong ka jylla u la kynthoh jur ia ki jingiasoi soskular da ka sorkar jylla bad ki company ha ki snem kiba la dep ha kaba ula ong “ ba ym shym la iohi ba kine ki jingiatehkular kin sei soh.
Ka jingialang jong ki khraw pyrkhat ha kaba ia dei bad ka jingdon kam ia ka bording eletrik ha kane ka dong shatei lam mih ngi jong ka Ri India ka la long ha Shillong. Ha kane ka jingialang la ia kren kumno ban wanrah ia ki nongbei pisa na ka bynta ba kin tei ia ki jaka pynmih bor ding.
Ha ka jingkren jong u Principal secretary jong ka jylla Meghalaya ba dei peit ia ka tnad pynmih bor ding jong ka jylla u la ong ba ka jylla Meghalaya ka don shibun ia ka “Shale Gas” bad ka jylla mynta ka dang wad ia ki lad ki lynti kumno ban pyndon kam ia kane ka gas.
Naka liang jong u Secretary u la kyrpang ia ka Independent Power Producers Association of India (IPPAI) ba kin wan ialam ia ki briew kiba lah ban bei pisa ha kane ka jingpynmih bor ding eletrik.
Haba ia dei bad ki jingiasoi soskular hapdeng ka jylla Meghalaya bad ki company bapher bapher ban tei ia ki jaka pynmih bor ding eletrik ha kane jylla kumba ka paw mynta kine baroh kim shym la long kiba seisoh u la kynthoh.
Na ka liang jong u Chief Secretary jong ka jylla u Bah WMS Pariat u la ong ba na ka IPPAI ka dei ban ai ia ka koiphot sha ka sorkar jylla ban peit bad na ka liang jong ka sorkar ka kloi ban ia treilang na ka bynta ban pynmih ia ka bor ding ha kane ka jylla.
Haba ia dei bad ki jaka puta ba ki don kam ki briew ne ki company na ka bynta ban shna ia ki jaka pynmih bor ding eletrik lada ki don kiba kwah ban wan bei pisa na ka liang jong ka sorkar ka kloi ban thied ia ki bad aiti sha ki nongbei pisa u la ong.(SP News)
