SHILLONG,Rymphnag,12: Katba ki sngi ki nang jan ha ka ban jied ia ki nongmih khmat sha KHADC ka ban long ha ka 24 tarik mynta u bnai hynrei ka la mih pat ka jingklumar ia ki nong shong shnong jong ka Mawlai Nongmali na ka bynta ka jingphiah konstitwensi.
Haba ia kren bad ki nongthoh kot khubor u Rangbah Shnong jong ka Mawlai Mawdatbaki u Bah P R Kharmujai ryngkat bad ki seng samla jong ka Mawlai Mawdatbaki ki la pynpaw ia ka jingsngewsih na kane ka jingphiah ia ki konstitwensi kaba la pynklumar ia ki Nong Mawlai kiba hap ha ka Mali I,II,III kane ka wan jia dei na ka jingpynslem u lat ka jylla ha ka ban pynbna ia ka jingphiah ia ki konstitwensi namar ba ki paidbah jong ka Mawlai haduh kine ki sngi ki la pynkhreh ban jied ia ki nongmih khmat na Mawlai.
Kumba ka long mynta ka Mawlai Nongmali ka hap ha ka jingpeit jong ka Municipal bad ha u snem ba la leit noh ba la pynlong ia ka ilekshon MLA kane ka kyntoit la pynhap noh ha ka North Shillong konstitwensi na ka bynta ban jied ia ki nongmih khmat katba ia ka MDC ka hap beit sha Mawlai.
Hynrei mynta ka kynti kynsan ki la ioh jingtip ba ki Nongmali ki hap ban jied ia ki nongmih khmat na Mawkhar kaba la pynklumar thlim ia ki Nong Mawlai kiba la pynkhreh ia lade ban jied ia ki nongmih khmat na Mawlai
Na ka liang jong u Rangbah shnong u lah dep ban ia kren bad u MLA halor kane ka jingphiah ia ki Konstitwensi hynrei na ka liang jong u,ula pan da ka kot ia kata ka jingphiah ia ki konstitwensi bad la pynshai da kaba ong tharai ba ka jingthep vote ha Mawlai ka lah ban long kum ka MLA katba na ka liang ka shnong ka khlem ioh ia ka kopi shaphang kata ka jingphiah ia ki konstitwensi.
Ka jingleh jong ka sorkar ka long kum ba niew beiñ ia ki nong Mawlai bad kheiñ ia ki kum ki poiwir shiphang na kawei ka konstitwensi sha kawei pat.
Ki Paidbah jong ka Mawlai kin sa pynlong ia ka jingialang paidbah ka ban long ha ka 15 tarik mynta u bnai la kin mynjur ne em ban ia shim bynta ha kane ka ilekshon.(SP News)
