Shillong, Jymmang 14: Ka tand shna surok jong ka jylla ka la sngewkmen haba ka la ioh ia ka sanction na ka bynta ban siew ia kabai khyndew ia ka surok kaba shna mynta ka Shillong sha Jingjal ha Garo Hills kaba iaid lyngba jong ka Nongstoin.
Na ka liang jong ki heh ka tnad shna surok jong ka sorkar jylla ki la iathuh ha u SP news Agency ba la ioh sanction ia ka bai khyndew ban siew sha ki paidbah bad kane ka pisa kala kot sha ka T.180 klur tyngka. Ia kane ka pisa la phiah ha ki ar bynta, kawei ban siew ia bai khyndew bad kawei ban siew sha ki tnad sorkar bapher bapher ia kaba la tip kum ka Line Department.
Da ka jingioh ia kane ka pisa ka PWD mynta kan sa lah ban pynsted ia ka jingshna ia ka surok na hynniewmer upper Shillong sha Jingjal ha Garo Hills, ka jingtrei kumba ka long mynta ka sngi namar ki don bun ki jingeh ha kaba ym pat lah ban siew ia ka pisa kaba dei jong ki tai khyndew bad sha ki tnad jong ka sorkar.
Ki department kiba ka PWD ka hap ban siew ka long kum ha ka PHE, ka Irrigation, ka MeCL. Ha kane ka jingshna surok ki don bun ki pipe um kiba hap ban pynjop, ki pile um ba ring sha ki jaka rep kiba dei jong ka tnad Irrigation bad ki dieng post electric kiba hap ban pynkynriah.
Ia kane ka pisa kin sa ai sha ki Deputy Commissioner ba kin siew sha kiba dei hok ban ioh kumba la dep ban jurip da ka tnad PWD jong ka sorkar jylla. Ka PWD ka kyrmen ba ia kane ka surok na Shillong sha Jingjal kaba iaid lyngba jong ka Nongstoin yn sa lah ban pyndep ha ka por kaba biang.(SP News)
