Nongpoh , Jymmang 12: Ka Khasi Students’ Union (KSU), North Khasi Hills District unit, tang ha ki san sngi ba jia ka jinglynshop ki bor
mariang, kaba ka ’erlangthari kaba jur ka la ioh ban syllad naphang
lin ia ka shnong Sohpdok bad ka Nonglum ha ka 8 tarik mynta u bnai,
hynne ka Sngi Hatmajai ka la leit ban noh synñiang da ki saw ban ki
tin sop ïing bad shiphew byrni u khaw sha ki lanot ka Shnong Nonglum
kaba hap ha Umroi Constituency.
Ia kitei ki jingiarap synñiang, la aiti da u Samla Vincent Makri,
general secretary katei ka seng sha u Rangbah Shnong ka Nonglum, u Bah
M Mawlong, ia kaba la sakhi lang da kiwei pat ki nongialam shnong bad
ki nongialam ka KSU NKHD, ba kynthup ia u Samla Augustar Nongbri,
finance secretary, Samla Raymond Jana, general secretary ka Umsning
Circle, Samla Edward Kshiar, vice president ka Byrnihat Circle, Samla
Sam Mukhim, general secretary ka Eastern Border Area, u Samla L.K
Sungoh, dkhot ka NKHD bad kiwei kiwei.
Kum u Rangbah Shnong, u Bah M Mawlong haba kren ha ka jingialang
shimti ia kitei ki mar ba la synñiang da katei ka seng bhalang ki
samla pule na Ri-Bhoi district, nyngkong eh u la ai khublei kyrpang ia
ki nongkitkam jong ka, kiba la wan ban noh synñiang sha ki arphew ar
tylli ki longïing jong ki lanot bad u la kyrpad ia ka KSU ba pyniakren
lem ia ki bor ka MeECL ba haduh mynta naduh katei ka 8 tarik, ki
paidbah nongshong shnong ki hap ban shongdum lynter namar ka jingthut
bad duh ki lai tylli ki post elektrik, kaba u la kynnoh ba ki nongtrei
ka MeECL kim shym la kitkhia ban wan moramot noh ia ki wat haba la jia
kat katei ka jingjia.
U Rangbah Shnong u la iathuh ruh ba na ka liang ki bor district ka
Ri-Bhoi ruh ki la wan jurip ha kaba iadei bad katei ka jingjia bad ki
la shim kyrteng ia baroh ki lanot khnang ban ioh ban ai jingiarap
mardor ia ki lanot kiba la shah ktah ha katei ka jingjia ba sngewsih.
U la ong ruh ba u MLA ruh u la shimkhia watla u don hapdeng ka met bym
shait bym khlaiñ bad u MDC ruh u la wan jurip kum ki nongmihkhmat ka
Umroi Constituency.
U Samla Vincent Makri kum u general secretary ka district, u la ong ba
kum ka seng ngim lah ban shu kun ha la ki mynsiem haba iohi ia la ki
paradoh parasnam ba kin shah shitom hadien ba ki la mad ia ki jingjia
ba sngewsih kiba kum kine ha ki bor ka mariang, kumta ka seng ka la
shim ia kane ka lad ban shakri ia la u parabriew kum kawei na ki
jingshakri ia U Blei.
U nongthoh khubor u la ioh ban lum ia ki kyrteng jong ki longïing kiba
la shah pynjulor ha katei ka ’erlangthari kiba kynthup ia ka ïing I
Kong Shiba Makri, Kong Solbanshon Makri, Kong Jantilin Makri, Kong
Perisha Makri, Kong Hemelin Wahlang, Kong Krinbina Wahlang, Kong Biora
Wahlang, Kong Riton Makri, Kong Diamon Makri, Kong Bilding Makri, Kong
Pyndondor Makri, Kong Dwit Lyngdoh Nonglait, Kong Bitilin Wahlang,
Kong Rophia Lyngdoh Nonglait, Kong Wandarisha Lyngdoh Nonglait, Kong
Sukjai Makri, Kong Birial Wahlang, Kong Blorisha Makri, Kong Spenda
Lymphuid, Kong Helen Lymphuid, Kong Thiol Makri bad u Bah Jewing
Makri.
Haba phai dien ia ka jingjia ha ka janmiet jong ka 8 tarik Jymmang, ka
’erlangthari ka la syllad shuwa ha ka por 12 baje tam ia ki nongshong
shnong ka Sohpdok kaba hap ha Mawhati Constituency bad hadien ba ka la
lynshop ia ki khatsan tylli ki ïing briew, kaba la wanrah ruh ia ka
jingmynsaw ia ki lai ngut ki dkhot jong kawei ka longïing, katei ka
lyer bah ka la phet wut sa sha Nonglum, kaba hap ha ka Umroi
Constituency, kaba la jia ha ka por ba mar ia bud bad katei ka jingjia
ha Sohpdok bad kaba wanrah ia ka jinglong lanot ki arphew ar tylli ki
ïing, kiba la shah syllad jem ha katei ka lyer.
Kawei pat ka jingjia ba phylla ba la iohlum mynta ka sngi ka long ba
kawei ka sign board jong kawei ka skul na Sohpdok ka la shah rong ha
katei ka ’erlangthari bad ka la hap ha kawei ka pyntha kba jong ki
trai shnong ka Nonglum, kaba dang lap ia ka hynnin ka Sngi Nyngkong da
ki trai pynthor. Katei ka jingrong jong ka ’erlangthari ia katei ka
sign board ka la long kumba shiphew kilomitar antad, na Sohpdok sha
Nonglum.(SP News)
