Shillong, Jymmang 18: Ka kong Wansukl Myrthong ka la pynneh pynsah ia la ka jong ka kyrteng ha ka khana parom ha ka jaid bynriew khasi ha kaba ka long long ka kynthei khasi kaba nyngkong kaba la lah ban kiew joit ha kliar jong u Lum Mangkashang mynta ka sngi.
Katkum ka kyrwoh kaba la phah da ka tnad pulit la pyntip ba ka kong Wansul Myrthong ka la poi hakliar jong u Lum Mangkashang mynta ka sngi ha ka por 8.30 baje mynstep. Kane ka la wanrah ia ka jingsngew sarong ha ka tnad pulit bad ka jylla Meghalaya hi baroh kawei.
Ka kong Wansuk ka dei kawei na ki dkhot jong ka kynhun kiewlum na North East ban leit kiew ia une u lum ba jrong tam ha ka pyrthei. Ia kane ka kynhun la khaweh lama kum ka jingsdang da u president jong ka Ri India ha ka 20 tarik jong bnai Lber ha Rashtrapati Bhavan, New Delhi.
Ka kong Wansuk ka la rung ha ka kam pulit ha u snem 2006, na duh katei ka por ka la shah pyntbit ia lade ha ki kam kiew lum ha poh jong ka Skiing Institute, Indo – Tibetan Border Police, Auli, Uttarkhand bad ha ka por ba ka shahd hikai la ithuh ia ka kum kawei na kiba tbit ha ki kam kiew lum.
Ka la iashim bynta ha ka jingiakop kiew lum kaba shiphew jong ka North East Zone Sports Climbing Committee kaba la pynlong ha Kangla Rock Wall ha Minuthong ha ka jylla Manipur.
Ha kane ka jingiakop kiewlum ka la ioh ia ka nam “best senior climber” ha ka liang jong ki kynthei ha kaba ka la ioh ar tylli ki takma ksiar. Ki lum kiba ka la dep ban leit kiew ki long u lum Kolahai Peak (5425 Mtr), u lum Papsura [6451 Mtr) ha Himachal Pradesh ia kaba la pynlong da ka MMTA, na Imphal. (SP News)
