Nartiang, Rymphang 23: U Bah Sngewbhalang Dhar PWD minister ha ka jingleit ialap election na ka bynta ki lai ngut ki kyrtong jong ka seng Congress mynta ka sngi ha, Nartiang, 8-Nartiang Umladang, Khanduli-Mynsngad Constituency u la kop ba dei tang ka seng Congress kaba peit ia ki duk ki rangli.
U tei u myntri u la ong ba “Dei tang ka seng Congress kaba kit ka khia ka shon, ka jingehjong ki rit ki ria, uba duk ba jynjar, khamtam ha kaba iadei bad ki surok ki lynti ki syngkien bad kumjuh ruh ka jinglait luid ia ka ri,” ong u Myntri ka tnat PWD jong ka Sorkar jylla u Bah Sniawbhalang Dhar ha ka jingkren ialap elekshon jong ki lai ngut ki kyrtong jong ka seng Congress kiba kynthup ia u Bah Thombor Shiwat ha ka jingialang ha ka shnong Nongrim Bambthong na ka 8-Nartiang Umladang Constituency, ia u Bah Phein Nanglein na ka Khanduli-Mynsngad Constituency bad kumjuh ruh u Bah Herman Phawa u kyrtong na ka seng Congress u Ban ia khun na ka Wahiajer Constituency.
ula ong ba kumba ki paid nongkyrshan kiba la dep pynjop teng ia u Bah Thombor kum u MDC, kin dei beit ban ieng tylli kawei ban pynjop biang khambun shuh shuh ha kane ka kynti da kaba pynioh shuh ki nongkyrshan.
Ha ka jingialang kaba la poi da ki hajar ngut ki nongkyrshan, na ka liang jong u Bah Dkhar ula pynpaw ia ka jingkmen ban iohi ia ka jingbun ki nongkyrshan ha ka jingialang. “Ka jingdon jong ki paidbah nongkyrshan ha kane ka jingialang kala pyni lypa ia ka jingjop jong u kyrtong ka seng,” ong u Bah Sniawbhalang Dhar.
Ula ong ruh ba kane ka jingwan jingialang jong ki nongkyrshan ka long kum ka jingpyni jingieid ia u kyrtong ka seng. “ha kine ki thaiñ ngi donkam ban ioh ia ki nongmihkhmat kiba dei na ka juh ka seng naba haba ar ngut ki nongmihkhmat ki don na ka juh ka ïing ka sem kan don ka jingiatrei kaba jan bha ha kaba iadei bad ki kam pynroi,” da kaba pynpaw ba kum ki paidbah ha kane ka elekshon MDC dei ban jied ia ki nongmihkhmat kiba trei baroh san snem, ym ia kito kiba heh tang ka nia hynrei khlem treikam.
Ha kaba iadei bad kane na ka liang jong u Myntri ka tnat PWD ula pynpaw ruh ia ka juh ka jingkren ha kaba iadei bad ka jingleh jong ka seng Congress. “Na ka liang jong ka sorkar Congress ha kine ki snem ban wan kan dang shim khia shuh shuh ha kaba iadei bad ki kam maramot ne pynbha ia ki surok kiba long kiba donkam bha ha kine ki snem ki ban dang wan,” ong u bah Dhar.(SP News)
