Jowai Naiwieng 26: Ka Jaintia Youth Federation (JYF-EJH) East Jaintia Hills, ka la leit
ia kynduh bad u DC East Jaintia Hills hapoh ka jingialam jong u samla Niwasly Rymbai President bad u John Pala Secretary Jong ka JYF-EJH na ka bynta ban kyntu ia u DC ban pyntreikam noh ia ki Permit Local Taxi kiba la ioh na ka office jong u DTO ka District khnang ba ki trai kali kin suk bad ki paitbah ruh kin shngain na ka jingshim kabu palat ki
kali kamai private kiba la pyndonkam be-ain bad ia knieh kamai bad kiba la dep siew ia ka bai permit kumba dei ban leh ia ka kamram ha khmat jong ka ain.
Na ka liang jong u DC u la kular ban shimkhia katba lah ban lum jingialang noh shen ia ki officer jong ka DTO ban pynbeit noh ia ka jingsahteng jong ka kam naduh ba la dep issued ia ki Permit Local Taxi sha ki trai kali, kiba la dep ioh na ka tnad ba dei khmih jong ka sorkar ban pyndep ia ka jingdawa jong ki trai kali kiba thrang lah slem ban ioh kamai noh hapoh jong ka District.
Ka East Jaintia Hills District ka dei ka thain ba bun eh ki kali private kiba kamai laitlan katba mon na ka daw ba ngim pat ioh ia ki Local Taxi kiba don ia ka permit kaba biang ban kamai hapoh ka thain, hynrei ka jingkamai beain jong ki kali private khlem ki kot ki sla kiba biang lane ka permit kaba skhem ka wanrah pynban ka jingartatien bad jingsyier mynsiem ia ki nongshong kali khamtam ba la mih teng ka jingia kulmar hapdeng ki kali kamai kiba la don ia ka lacal taxi permit bad ki kali private kiba kamai beain ong u samla Niwasly Rymbai President ka JYF-EJH.
Ka jingdon jong ka office DTO ha ka East Jaintia Hills ka dei ka jingmyntoi kaba khraw ia ka District bad ia ka thain hi baroh kawei, namar ka iarap shibun eh ia ki briew jong ka thain ban ioh ia ka jingshakri kaba kham jan shuh shuh bad ki paitbah ban nym leit shuh sha jowai na ka bynta ki jingdonkam ha ka ba ia dei bad ki kam kali jong ki.
Na ka liang u Samla Niwasly Rymbai President jong ka JYF-EJH, u pynpaw ka jingsngewnguh ka ba khraw ia Deputy Commissioner jong ka Easjt Jaintia Hills, uba la ai jingkyrmen ia ka Seng da kaba kular ban shimkhia ia ka jingdawa jong ka JYF-EJH ban ialeh shitom ban iai buddien ia ki jingdawa kiba donkam kyrkieh hapoh ka District ong u tei u President.
Kumta na ka liang ka JYF-EJH ka kyntu ia ka sorkar lyngba u DC ba kin pynkloi noh ban pynurlong ia ka jingthrang jong ki paitbah ka Districtkhnang ban lait na kino kino ki jingia kulmar hapdeng ki kali kamai bad ki kali private, kiba ia knieh kamai bad kiba la ioh ia ka permit na ka office jong u DTO pynkut u kyrwoh khubor na u samla John Pala
Secretary ka JYF-EJH.(SP News)
