Shillong, June 13: Kular u Dr Mukul Sangma, Chief Minister, Govt of Meghalaya, ban khmih bniah ia ka shithi ba poi na ka tnad Ministry of Home Affairs, Govt of India. Katei ka jingkular la kren u Chief Minister, ka jylla Meghalaya, haba u Bah John F Kharshiing, Chairman, The Grand Council of Chiefs of Meghalaya, & Spokesperson, Federation of Khasi States, u la leit ai ka Dorkhas sha u Chief Minister mynta ka sngi 12 tarik June 2013, por 4 baje janmiet, ha karma treikam jong u Chief Minister hapoh Meghalaya Secretariat.
U Chief Minister, u la ong ba ka Sorkar Meghalaya kan sa shim khia ban thaw ki lad ki lynti ban pynbeit ia ki jingeh jong ki Khlieh Nongsynshar ha kiba dei ban sumar bad ri ia ki dustur bad ki riti hapoh ka jylla Meghalaya, u la ong ruh ba kane ka kam yn hap bishar bniah namar ha ka juh ka por ka dang iaid ka jingpynkhreh ban pynbeit thymmai (Amend) da ka Sorkar Jylla ki ADC bad ka Sorkar India ia ka 6 Schedule, kaba kdup ia kumba shiphew tylli ki Autonomous District Councils hapoh ka thain lam Mihngi (NE), bad ia kane ka jingdawa na ki Khlieh Nongsynshar yn hap ban pynkhat kumno ban pynwan dur ba kan long kaba iadei bad ka jingangnud ki paidbah.
Kane ka kam ka la nang khih hadien ka jing leit iakynduh ka kynhun ki Khlieh Nongsynshar Khasi Garo bad Jaintia, (Grand Council of Chiefs of Meghalaya – kaba kynthup ia Federation of Khasi States, Ka Dorbar Ki Dolloi, Ki Sirdarship, bad Council of Nokmas), ha ka 7, 8, bad 9 tarik u bnai June, 2012, ha New Delhi, ha kaba la ia kynduh ia u Shri. V. Kishore Chandra Deo, Union Minister for Tribal Affairs, Govt of India, ka Smt. Sonia Gandhi, Chairperson, UPA, bad National Advisory Council (NAC) bad ia u Shri. M. Venkaia Naidu, MP & Chairman, Parliamentary Standing Committee on Home Affairs, kiba la bthah ia ka Ministry of Home Affairs ban khmih ia kine ki jingujor na ka liang ka Grand Council of Chiefs of Meghalaya.
Ha katei ka jingiakren, u Chairman, Grand Council of Chiefs of Meghalaya, & Spokesperson, Federation of Khasi States, u la pynkynmaw ia u Chief Minister, ia ka jingkren jong u Late Prime Minister, Shri. Rajiv Gandhi, uba la kren kine ki kyntien hapoh Parliament ha ka por ba u pynrung ia ki jingpynbeit(Amendments) bad ki AIN 73rd and 74th Amendments (Panchayati Raj Bill) ha ka 15th May 1989, da kaba ong quote “The Bill recognises that in the three states of North East – Nagaland, Meghalaya and Mizoram – there are traditional systems of self Government, akin to Panchayati Raj, which must be preserved……….. In these three states the Traditional systems will be left undisturbed”. Unquote. U Bah John F Kharshiing, u la pynpaw ruh ha u Chief Minister ba ka la don ka kynhun ba la ialam da ka Sorkar Meghalaya, kaba la kynthup lang ia ki ADC bad ki Khlieh Nongsynshar, Khasi, Garo bad Jaintia, ha kaba ki la ia kynduh ia u Late Prime Minister Shri. Rajiv Gandhi ha Kolkata ha ki snem 1988-1989, bad ha kata ka jingiakynduh la kular ban pyllait ia ka Meghalaya na ka Panchayat, bad ka ong ba kin sa pynpaw dur kyrpang ia ki jingsynshar tynrai jong ka jylla Meghalaya hapoh ka Constitution Ri India.
Lah ban pynkynmaw ba ka tnad Sorkar India ka National Commission for Tribal Affairs, Govt of India, ka bor kaba ha Khlieh duh kaba dei peit ia ki jingeh jong ki riewlum, hadien ka jingbishar kaba bun, ha ka 26 tarik April 2012, ka la pynmih ia ka jingbtheh / hukum ha ka tnad Ministry for Tribal Affairs ba kan khmih peit bad pyndep ia ki jingkular kiba dang sah kumba la ia kut ha ka Instrument of Accession and Annexed Agreement of 17 August 1948.
Kumjuh ruh ka tnad National Commission for Human Rights,(NHRC), Sorkar India lyngba ka shithi kaba 16 June 2012, hadien ka jing bishar ia ka jingujor na ka liang ki Hima Khasi States, Federation of Khasi States, ki la pynpaw shai ba ia kitei ki kam bad ki jingiateh kiba dang sah teng ‘ki long ki kam kiba ka Parliament ka lah ban tuklar bad pyndep, bad la bthah ia kitei ki nongujor ban ia kren iakynduh bad ki bor Sorkar India ban pynbeit ia kitei ki kam kiba dang sah teng’.(SP News)
