Shillong, K`lyngkot, 31: Hadien ba ka Party Congress kala kyntait ban ai ticket, u Bah Bantyngshain Rynga u la shim ia ka rai ban ia khun noh kum u kyrtong shimet ha kane ka MDC election na Shella Constituency ia kane ka rai la shum ha ka jingialang kaba la long ha ka 28 tarik mynta u bnai.
Ha kane ka jingialang la shim langh ia ka rai ryngkat ki nongkit kam ka seng Congress na Shella, ym tang kata kila rai ban mih noh na ka seng shisyndon. U Bah Rynga u la ong ba kin nym kynran dien hynrei kin ia khun ia kane ka MDc election.
U Bah Rynga u la ong ba “kane ka jingmih noh jong nga bad ka kynhun jong nga na ka Party kam dei satia ka jing shim rai laplah ne ban shu ryngkoh matlah hynrei dei halor ki nongrim kiba biang namar ba kum uwei na ki khun samla jong ka thain Shella uba don ia ka kit khlieh bad uba kwah ban ia tynrong lang ia ka lyngkor ban kit ban bah na ka bynta ka khia ka shon na ka bynta ki paidbah jong ka thain hi baroh kawei ban shakri da ka mynsiem kaba khuid bad kaba suba mynta la bun bun snem nga la pynlut ia ka por ban shakri ia ka thain bad ia ka jaitbynriew hi baroh kawei”.
U la ong ruh ba “kum uwei na ki nong treikam mon sngewbha lyngba ka kynhun seng bhalang, kumta ha kane ka kynti kaba mynta ruh wat lada ngam don shuh ha ka kynhun seng bhalang hynrei ka mynsiem ban shakri ia ka thain bad ia ka jaitbynriew ka dang iai rhem hapoh jong nga, kumta kumba ki nongkyrshan bad ki paidbah jong ka thain hi kila shaniah tylli hanga ban mih shakhmat ha kane ka Election MDC 2014 sha ka Ing dorbar thaw ain jong ka KHADC nga sngew ban ong ba ka jingduh ticket jong nga na ka seng Congress kam shym la pynduh mynsiem satia ianga hynrei da ka jing pynbor jong ki paidbah ngan ialeh khlem kyrtiang dien ban pynurlong ia ka jing angnud jong ki paidbah ka thain hi baroh kawei”.
Na ka liang jong u Bah Rynga u kyntu ia baroh ki nongkyrshan ba kim dei ban shah ialam bakla hangno hangno ruh hynrei ban iai neh hala ka jong ka nongrim bad skhem jingmut da kaba ia trei shitom met bad mynsiem tad haduh ban da poi sha ka thong jong ka jing jop donburom.(SP News)
