Jowai, Naiwieng 11: Ka Jaintia Youth Federation (JYF) Central Body ka pynrem jur ia ka jingphahkem ka sorkar ia ka nongialam jong ka CSWO kong Agnes Kharshiing kum ka nongialam ba khraw ban ieng iada ia ki kup shilliang ki sem shilliang, pyrshah ia ka jingleh donbor bad ehrang mynsiem ka sorkar jylla hapoh ka jingialam jong u Mukul Sangma ka la long shaba palat liam, khlem don jingsngew shuh ia u luk u lak, khlem jingsngew synei haba la iap duh ka jingiatip lem hakhmat u briew hakhmat u Blei,
ka long ka jingiam briew bad pait dohnud ba ki ba ha ing ha sem kin peit ia la ki jong ki doh ki snam ba kin kylla phetwir ha la ka jong ka Ri khlem dei por.
Ka jingkem ia ka Kong Agness Kharshiing ka dei tang ka buit arsap jong ka sorkar ban pynthut ia ka jingiakhih ILP jong ki 10 Seng kaba dang iaid shaphrang ban pynbor ia ka sorkar ban pyntreikam ia ka ILP ha ka ne ka Jylla rit pait jong ngi, khamtam ka dei kawei na ki nongialam seng kynthei CSWO ba kham stad bad nep jabieng kaba pyndonkam da ka RTI ban lap ia ki jingtreikam arsap ka sorkar lyngba ki tnad bapher bapher ong u bah PL Majaw President ka JYF.
Ha ka jingshisha ka sorkar kadei ban leit pynpra ia ki ing beain ba la tei da ka sorkar Assam ha ki thain Border kum sha Block I, Block II, Khanduli, Psiar,Moolber ter ter, hynrei ka ialeh khla pynban ia ki trai Ri trai muluk kiba dei kiba im na kti ha ktien, ka sorkar ka dei ban kdup kum ki khun ia ki trai jylla bym don iing don sem ne don jaka ban rep ban riang, ka sorkar ka dei ban kit khlieh ia kine kiei ki ei baroh khamtam lei ia kiba duk bym don ka bor ong u bah Majaw.
Kaba lyngngoh shuh shuh hangne balei pat ka sorkar, ha ka jaka ba kan ai ka sha ki ba duk ka leit knieh pynban wat ia kaba ki don, imat ka don ka ei re ka ei ha lyndet ka ne ka jinghiar thma ban pynpra ia ki ing ki sem jong ki nongshong shnong jong ka Umsawli bad Mawtari ong u tei u nongialam jong ka JYF.
Ka jing leit pynpra ki bor Meghalaya Urban Develop ment Authority (MUDA) jong ka sorkar jylla ia ki iing jong ki paidbah ha Umsawli bad Mawtari, ka la long kumba leit jop thma ia ki riew lui lui naba la tip lypa ba ki dei tang ki rit ki ria hakhmat jong ka MUDA kaba la wanrah da ki spah ngut ki pulit kieng atiar ban ialeh lada ki nongshong shnong ki pynwit ryngkat ka jingsynran ki Magistrate bad ki Rangers.
Ka long ka ba sngewlehrain ia ka (MUDA) sorkar jylla ban iohi ba ka ialam haduh saw tylli ki Bus sawkhmut bad bun tylli ki kali Gypsy ki pulit ban pynma ia ki long iing kiba dei ki nongshong shnong kiba duk. bad im da ka rep ban ioh pyndap ha ing ha sem shu kylla phet wir noh bad sakma ha ka jingdum bad ka rit mynsiem.
Ka ne ka jingleh jong ka sorkar ban iuhroit ia ka hok long briew man briew ka la long beain, kaba ktah ia ka jingmut jingpyrkhat (Mentallity Harrasment) kito ki briew kiba shem lanot ne kylla phetwir da ka jingtieng kaba la pynrit mynsiem ia ki khun trai Ri trai muluk ban sheptieng ia ka jingkhrawbor jong ka sorkar ha ngamei bym don jingsngew shuh ia ki rit ki ria pynkut u kyrwoh na u bah PL Majaw.(SP News)
