Shillong, Jan 29: Kum ka jingburom ia ki riew ialeh laitluid jong ka Ri Bangladesh, ka sorkar Bangladesh mynta ka kwah ban wad ia ki shipai kiba la aiti ia la ka jong ka jingim namar ka Ri ha ka thma ‘Liberation War” ia kiba la tep hapoh kane ka Ri India.
Ka sorkar Bangladesh ka kwah ban shimti biang ia ki ban rah ha la ka jong ka Ri jong ki bad kane kan long ka jingkmen ia ka bynta kiba ha iing ha sem bad kum juh ia ka Ri Bangladesh ba ka kwah ban pyndon burom ia ki ha ka rukom kaba dei.
U High Commissioner ka Bangladesh sha India u u la ong ha ki nongthoh khubor ba mynta ki dang pynkhreh ia kane ka skhim ban wad ia ki shipai kiba la khlad bad tep ha India, lada ki don kiba dang lah ban tip kin rah sha Bangladesh bad lada ymtip shuh kin tei da u mot sah kynmaw.
U tei u heh jong ka sorkar Bangladesh, u la ong ba ha ka thma jingialeh laitluid bun na ki shipai jong ka ri jong ki ki la iap bad bun la tep ha kane ka jylla Meghalaya namar ka jinglong jingman ha kato ka por kam long ban rah ia ki sha Bangladesh. Mynta ka Bangladesh ka kwah biang ban rah ia ki lada ka dang lah ban tip.
Na ka liang jong ka sorkar Bangladesh kala dep ban thoh sha ka sorkar India ba kan aiti ia ki briew jong ka Bangladesh kiba la aiti ia la ka jong ka jingim ka jong ki na ka bynta ba ka Ri bad lada ki dang lah ban ioh ki lah ban pyndon burom ia ki ha ka sngi burom ia ka ri jong ki ka Bangladesh.(SP News)
