Shillong, Nohprah 06: Ka seng sain pyrthei ka HSPDP ka la phah da ka jingthoh sha u peime minister jong ka Ri India ba yn tuklar ia ka jingia kajia pud hapdeng ka jylla Meghalaya bad ka jylla Assam ia kaba ym shym la lah ban pynbeit haduh kine ki sngi.
Ha kane ka jingphah ia ka shithi sha u myntri rangbah duh jong ka Ri na ka liang jong u bah HS Lyngdoh present jong ka seng u la iathuh ba ki la dawa na ka sorkar pdeng ba kan pynsangeh ia ka jylla Assam ban leh ia ki kam kiba ktah iaki paidbah ha khappud bad ka jylla Meghalaya.
Kane ka jingleh donbor jong ka jylla ka Assam ka long na ka por sha ka ka por ha kaba u la kdew iaki katto katne kijingjia, ha u snem 1979 ka Assam ka la buh iaki 380 ngut ki Nepali ba kin shong shnong ha ki khlaw jong ka jylla Meghalaya kaba hap hapoh ka riad Nongmynsaw.
Ha u snem 2010 kala siat iap ia ki saw ngut ki briew ha Langpih bad dang shen ha ka kem ia u president jong ka HANM jong ka North Khasi Hills bad ka la don ka jingweng ia ki 64 tylli ki shnong khasi na ka map jong ka jylla Meghalaya.
Ka tnad survey jong ka Ri India ka la pynbkla ia ka Map jong ka jylla Meghalaya bad kane ka la pynkulmar ia ki paidbah . U la ong ba don bun ki shnong kiba ka Assam ka la kam, bad kita ki long, 8 tylli ki shnong ha Raid Mynsaw, 14 tylli ha Byrnihat, 28 tylli ha Riad Khyriem, 32 tylli ha Balock I bad 6 tylli ha Ratachera ka jaka kaba ia khap bad ka Bangladesh.(SP News)
