Shillong, Kyllalygkot 05: Katba ki nongialam jong ka seng Congress ki dang ia bun kam ban ia knieh tiket ha Delhi ki nongkyrshan jong kane ka seng ki kwah ban U Salseng CH Marak un long u nongialam ha dien ka election namar kumba ka long mynta la thikna ba yn wan phai biang kum u MLA.
Bun na ki nongialam jong ka seng Congress haba kren ha u SP News Agency ki pynpaw ba kane ka jingslem ban pynbna ia ki kyrtong jong ka seng ka dei na ka daw ba ka don ka jingiashrud para nongialam hapoh ka seng Congress kumba ka long mynta ka don ka kynhun kaba but ia u Dr Mukul Sangma bad ka wei ka kynhun ka but ia u Bah DD Lapang.
Ban pynlait ia kane ka jingiakynad na ka liang jong ki nongtrei ka seng Congress ki pynsngew ba u briew balah ban pdiang da baroh ki liang dei tang u Salseng CH Marak bad ia kata ki la iohi ha ka por ba u long u myntri rangbah ka jylla naduh u snem 1993-1998, wat la ka dei ka sorkar synrop hynrei u la lah ban thaw ia ka history ha kane ka jylla ba dei tang ma u marwei u ba la lah ban pynneh ia lade san snem ha ka shuki myntri rangbah.
Ka jingong ba pynduh Tiket ia u Bah S Nongrum na Rajabala ka long kaba eh shibun bad lada ka jia kane ka ktah ia ka party baroh kawei. Ki nongialam jong ka seng Congress kim dei ban klet ia kaei kaba la jia ha Jirang constituency ha kaba u MLA, u bah JD Rymbai u duh ticket ka jingduh ia ka jirang ka long ka jingduh ia ka party.(SP News)
