Khliehriat, Naiwieng 20: Ka jingkylla rong blu bad ka jingiap pathar ki dohkha 
ka la jia biang ha Wah Lukha mynta u snem ha kaba kala sdang biang naduh sngi Thohdieng shiteng synnia. Kane ka jingkylla rong kynsan jong kane ka wah ka wanrah biang iaka jingiap pathar ki dohkha ha kaba ka pynbynnud haduh katta iaki paid nongshong shnong ba marjan kane ka Wah. Kane kam dei ka sien ba nyngkong, hynrei ka shait jia man la u snem tang shu poi u Naiwieng (November) kaba la sdang nyngkong naduh u snem 2007 hadien ka jingwan mih ki Company Factory ha katei ka thain.
Ka KSU Narpuh Circle bad ki paidbah ki dap da ka jinglyngngoh kaba khraw ia kane ka jingai bih ia ka Wah Lukha ba man la u snem, bad kaba pynduh jingkyrmen ia ki paidbah ka long baka sorkar ka sngap jlang jlang khlem leh eiei,ne ban wad ki lad ki lynti ban ioh kem ia kiba donkti bad leh dusmon ia kane ka Wah Lukha kaba bna nam ha ka jingbun
ki dohkha.
Ka sorkar ka lehbein shisha ia ki paidbah jongka thain Elaka Narpuh khamtam ia kito ki shnong kiba don hajan Wah Lukha kiba ioh jingmyntoi na ki dohkha ba don hapoh kane ka wah da kaba khwai.Ym tang ki nongshong shnong kiba pynpaw iaka jingsngewsih namar kane ka jingjia ia ka Wah Lukha, hynrei jan baroh kito ki riew ieit khwai dohkha kila pynpaw lem ka jingbynniaw halor kane.
Kane ka jingber bih dusmon ia ka Wah Lukha ka wanrah ka jingma kaba khraw ia ki paidbah khamtam ia ki khynnah bapli ki bymtip ia ka bneng ka khyndew,kiba leit sum bad jngi sngewbha ha kane ka wah bad dih ruh iaka um namar ki lah ban iohei iaki jingpang sniehdoh( skin diseases) bad kiwei kiwei pat ki jait jingpang.
Ka seng ka pynpaw shuh shuh ia ka jinglyngngoh ba kumno kane ka jingkylla rong blu bad ka jingiap pathar ki dohkha ha katei ka Wah ka shait jia beit tang hapoh ka 20 tarik u bnai November kata ruh tang shu dei ka por pynhap jar ban riam dohkha da kito ki nongthied wai(Contract) ia ka Wah Lukha.
Katkum ka kaiphod bala pynmih daka Meghalaya State Pollution Control Board (MSPCB) haka jingkylla rongblu ba nyngkong katei ha u snem 2007, la pynpaw ba ka jingkylla rong bad jingiap ki dohkha ha katei ka Wah kadei na ka jingdon ki par dewiong bad par mawshun hapoh katei ka District. Hynrei kaba lyngngoh ka long ba kumno katei ka lah ban long ha kaba ka jingkylla rong bad jingiap ki dohkha ka shait jia tang haki
aiom bymdon slap. Jin lada dei naki daw u dewiong ym nymdon dohkha shuh wat tang iwei ruh hakatei ka Wah haduh mynta kumba jia ha kiwei ki Wah kumba jiaia ka Wah Kupli bad Wah Lunar hapoh Thain Jaintia kiba shah ktah na u dewiong.
Ka jingbymshimkhia ka sorkar halor ki jingjia ha wah lukha ka pynshlur shuh ia kito ki nongai bih ban leh dusmon ia kane ka wah ba bun dohkha.Ngi dawa jur ia ka sorkar bad ia u DC ka East Jaintia Hills Dist ban jurip mar mar ia kane ka wah ban lap dalade,bad lada kasorkar kam treh ban shimkhia ban sumar sukher bad ban pynneh pynsah ia
ki dohum ha kane ka wah,ka seng kam banse ban pynkhih paidbah pyrshah ia ka sorkar lane wat ban ujor syndon da ka PIL, la pynkut ka kyrwoh na u Vice President ka KSU Narpuh Circle , Samla Phanuel Tongper Ka Seng ka dawa ruh naka sorkar ban pyntreikam iaka Water Policy naka bynta ban iada bad ban pynbha iakatei ka Wah ba pawnam ha poh Jaintia naka jingshah pynjot bad shah pynsniew haki riew shim kabu. Kane ka long katkum ka kyrwoh kaba la phah da ka KSU.(SP News)
