Jowai, Naitung 16: Ka Jaintia Youth Federation Central Body ka pynpaw ia ka jingkyndit kaba jur haduh katta katta halor ka jingbym don jingkit khlieh jong ki nongmih khmat ka JHADC ban peit ia ka iap ka im jong ka Jaitbynriew kumba la seng nongrim ia ka hapoh ka Sixth Schedule ka Riti Synshar ka ri India na ka bynta ban iada ia ka hok ka kynti, ka riti ka dustur bad ia ka khyndew ka shyiap ban leh ne pyndep ia ka jingiateh soskular (MoU) hapdeng ki company pynmih dewbilat bapher bapher kiba la wan buh karkhana ha East Jaintia Hills.
ka JYF ka la pynkynmaw ia kaei kaba U Lat ka Jylla, u RS Mooshahary ha shwa ba un shongthait noh na ka shuki u kren shai da kaba kdew ba ki District Council kiba don ha ka jylla ki dei kiba khlainbor bha kiba ka kamram jong ki ruh kadei ban iada ia ka jinglong trai bad ka nongkynti jong ki trai shnong, u la bynrap ruh da kaba ong, “Ki District Council ki donkam ban kham donbor bad treikam bha bad ki dei ban pyntikna ban pyntrei ia baroh ki kyndon kiba don ha ka 6th Schedule khnang ba ki briew kiba nabar kin ym lah ban knieh noh ia ki jaka puta jong ki paidbah”. Kaba mut ki Company cement kim dei ban iaid lait ia ka JHADC kaba dei ka nongkynti jong ka Sixth Schedule ong u P.Majaw President ka JYF.
Na ka liang jong ka JYF ka la kynnoh baKa Jingai NOC jong ki nongialam ka JHADC ha ka por jinglong CEM jong u bah Qually Suiam bad u Bah Hambertus Nongtdu ia ki Cement Company khlem ka no kano ka jingia soi ne jingiateh kyndon .Kka jingai NOC ka JHADC ia ki ne ki kharkhana pynmih dewbilat kam don jingmut ne wanrah jingmyntoi ei ei ruh em ia ka District Council namar ki Cement Company kim khein snep ia ka District Council kam don ka no kano ka jingiakut kum ha ka ban pyniohkam iohjam ia ki samla, ban tei ia ki skul, ki jaka ai jingsumar bad ruh ban wanrah ia ka roi ka par ha kine ki thain ba don kine ki kharkhana pynmih dewbilat,
Ka jingbymioh khajna ka JHADC na ki karkhana pynmih dewbilat ka dei ka dawbah dawsan jong ki MDC baroh ban shim ia ka jingkit khlieh ban pyndonkam ia ka iktiar ba la dep pynkup ha ki kum ki riew donburom ban ia sait ha ka ban wanrah jingkylla hapoh ka Council ym ban shaniah than ha ka sorkar Jylla.
Kumta na ka liang jong ka JYF ka kyntu ia ka District Council ban pyndep noh kloi katba lah ban pynthymmai biang sa shisien ia ka NOC jong ki Kharkhana pynmih dewbilat kiba don ha East Jaintia Hills
baroh, da kaba buh ia ki kyndon kiba khlain bor khnang ba hadien kin ym nud ban leh kulmar khlem ka jingtip jong ka Council ong u bah P.Majaw President ka JYF Sengkmie.(SP News)
