Shillong, Jymmang 27 : U Myntri ka tnad Community and Rural Development ( C & RD) u bah Prestone Tynsong u la ia kynduh ia u Myntri ka sorkar pdeng ba dei peit ia ka tnad pynroi nongkyndong u Jairam Ramesh ha nongbah New Delhi. Ha katei ka jingiakynduh la iakren halor ka pisa ba dang dei ban ioh da ka sorkar Meghalaya na ka bynta ka Mahatma Gandhi, National Rural Employment Act (MGNREGA).
Ha kaneka jingiakren u tei umyntri jong ka sorkar pdeng u la kular ban pyllait ia ka pisa ba sah T. 109 klur tyngka na ka bynta u snem 2012-13. Naka liang jong u myntri ka sorkar jylla u Bah Prestone u la ong ba ka jingiakren ka long ba da ynda la ioh ia kane ka pisa uns a lah ban pyndep ia ki jingtrei kiba dang sah teng ha kane ka jylla kaba dei na katei ka skhim.
Da ka jingkular utei u myntri ka sorkar mynta kan lah ban siew ia kito ki shnong kiba dang dei ban ioh pisa hadien ba la dep pyntrei ia ka skhim bad kumjuh ruh ban sdang ia kiwei ki skhim ba thymmai ruh. Namar u la ong “ Kumba long mynta hadien ba ym shym la ioh pisa na ka sorkar pdeng kiba bun ki shnong ki thaw ruh ki la kynran dien ban pyntrei ia katei ka skhim hynrei mynta ka jingkyrmen ka la wan biang ha ki paid nongkyndong namar utei u myntri katei ka tnad sorkar pdeng u la kular ban pyllait noh kloi ia ka pisa na ka bynta kane ka jylla”.
Shuh shuh lah ban pynkynmaw ba ki la don ki jingujor sha ki kot khubor halor ka jingsahteng ka pisa bad jingbym ioh ban sdang ia ki project ba thymmai namar ba khlem ioh pisa shuh na ka sorkar pdeng. Ka daw ka long ba wan noh ka election bad nangta bud sa ka Dorbar Mang Tyngka jongka jylla, kumta mynta ba la ioh ban leit sha Delhi bad iakren halor katei ka kam ka jingkyrmen ka la wan biang sha ki paidbah ban ioh sdang biang ia katei ka skhim ha ka jylla.(SP News)
