Kynmaw burom ka Iing Dorbar KHADC ia u Bah Ryntathiang bad Moksha

Shillong, Risaw 29:Ka Dorbar jong ka KHADC hynne ka sngi, ka la pynlong ia ka jingsngap jar ba shiminit kum ka dak ban pynpaw ia ka jingsngewsih halor ka jingkhlad noh ki ar ngut ki dkhot, u bah FK Ryntathiang, MDC na Mawthengkut bad u Bah S.R Mosksha MDC barim na Umsning Constitency,

Ka jingkhlad syndet jong u Bah FK Ryntathiang ka la pynkyndit ia ki dkhot ka Iing Dorbar, bad ka long ka jingduh kaba khraw ym tang ia ka iing ka sem, ka Constitwency hynrei khamtam ia Council bad ka jaidbynriew.

Hynne ka sngi, jan baroh ki dkhot ka iing dorbar ki la ai jingkren ban pynpaw ia ka jingsngewsih halor ka jingkhlad noh kitei ki nongialam, kiba la noh syniang ban iatei bad ai jingmut kumno ban saindur ia ka rukom treikam ka Council.

Ki la pynpaw ba ka long ka jingduh kaba khraw ia ka iing baroh kawei, khamtam u bah Ryntathiang uba kloi ban iarap bad ai jingmut ia ki para dkhot bad ka council ha kino kino ki khep ba ki donkam.

Na ka liang Executive Committee hapoh ka jingialam, u Bah Pynshngainlang N Syiem kum Chief Executive Member ha ryngkat lang bad kiwei ki dkhot ka Iing ka phah ka jingsngewlem sha kiba ha iing hasem jong kitei ki nongialam ba U Blei un don ryngkat ban pyntngen ia ki.

Kiba la ai jingkren ki kynthup u bah Titos Chyne, MDC na Sohra, bah Embhah Syiemlieh bah PK Pangniang, bah R Rani, bah Lambor Malngiang, bah Atanio War, bah Otril Pamshong, bah Artis Rani, bah Adelbert Nongrum, bah LG Nongsiej, bah Teinwell Dkhar, bah James Ban Basaiamoit, bah Jansing Tynsong, ka Kong Airin Lyngdoh, kong Grace Kharpuri, kong Telinia Thangkhiew.   

Kum ban shu pynkynmaw u bah FK Ryntathiang, ula long u MDC jong ka Mawthengkut naduh u snem 2009-2013. katba u bah SR Mohksha ula shah jied kum u MDC ha ka por ka sorkar Assam na Umsning, kata ha u snem 1967-1972 bad kum u MLA na Mawhati ula shah jied lai sien naduh u snem 1983-88, 1988-93, 1993-1998.

U Bah PK Pangniang MDC (HSPDP) ula ong, ba u bah FK Ryntathiang u long u nongtbeh jingshai ia ka thain, uba la ioh ka jingieit na ki paidbah namar ki jingleh bha jongu ban ri ia ki khun swet kiba shem lanot bad jynjar.

“Watla ym don eiei ka spah hynrei u long uba sbun ka mynsiem ban iarap ia ki paralok da ka jingkhuid mynsiem bad kum u nongialam u long shisha uba nep jingmut kumno ban saindur ia ki kam ha ka sain hima sima bad ka imlang sahlang,” ula bynrap.

Kaba sngewtynnad ban tip ka long, ba une u rangbah u wan na ka longiing baduk kum u khun swet hynrei u long pynban u nongri ia ki khunswet, watla um long uba bit ba biang kum kiwei ki nongialam sanin hima sima.

U bah Embhah ula ong, u long u briew uba kloi ban iarap khlem ha kano kano bad uba kut jingmut ban trei ia ka kam da ka mynsiem ba palei.

U Bah Fabian Lyngdoh MDC, na Umroi uba long u Chairman ka KHADC ula ong, ba bah SR Moksha u long nongrep slasha ba nyngkong ha Ri Bhoi, bad hadien ka jinglong MLA ula trei ia katei ka kam kum nongpruid dak ban ialam ia ki samla ba kin lah ieng hala ki jong ki kjat.

“U long u briew uba jai jai bad u bym ju pynduh jingkyrmen ia ki briew kiba wan donkam,” ula bynrap.

U Bah O Pamshong MDC Mawhati ula ong, ba u bah Moksha ula shah jied kum u MDC na Umsning Constitwency ha ka por synshar ka Assam ha u snem 1967-72, hadien ba la ioh ia ka jylla la pynduh noh ia ka Umsning bad la thaw ia ka Mawhati kaba u iakhun ha u snem 1983 bad ula jop haduh lai sien kynthih, ula nonh synniang ia ka jylla bad ka ri ha kiba bun ki liang kum u MDC bad u myntri sorkar ka jylla.

U bah A Rani MDC na Jirang ula ong, bun ki briew ki tip bha ia u bah Moksha kum u MLA sa iamah, kaba mut ngan sa peit ia ki …….kaba pyni ba um ju pynduh jingkyrmen ia kino kino ki briew kiba wad jingiarap.(SP News)