Shillong, Nohprah 09: Ha ka jingpynlait khubor jong ka ANVC(B) mynta ka sngi ka la kynnoh ba dei na ka jingbym leh ei ei jong ka sorkar ba ki dkhot jong ka seng kiba la don ha ka jingiakren ia suk bad ka sorkar ki sa phet bad leit ban iasoh bad kiwei ki kynhun lehnoh.
Kane ka seng lehnoh ka la kynnoh ia u myntri rangbah ka jylla u Dr Mukul Sangma u ba la khot ia ki ba kin wan ban ia shim bynta ha ka jingiakren ia suk bad ka sorkar, hynrei mynta na ka liang jong ki nongialam ka seng ANVC(B) ki iohi ba kane ka dei tang ka buit politic ka Congress bad ka ANVC.
Ha ka jingpynlait khubor na ka liang jong ka seng la ong ba Mithun M Sangma u ba la shah kem na Borsora u la mih na ka seng ha u Nailar mynta u snem bad u la rah ar tylli ki suloi jong ka seng. Na ka liang jong ka seng ka la khang pyrshah ia kane ka rukom lum pisa hynrei na ka daw jong ka jingbym leh ei ei ka sorkar ka la buh ia ki dkhot ha ka jingeh ban im.
Na ka liang jong ka ANVC(B) ka la ong ba ka sorkar kam shym la leh ei ei ban wanrah ia ka jingshong suk ha Garo Hills, na ka liang jong ka seng kam don lynti da kumwei pat ban im ki hap ban leh da kano kano ka kam khnang ban dup lah ban bat ia ki para dkhot jong ka seng namar ka seng kam kwah ban iohi ba ki dkhot kin rah suloi biang sa shisien.(SP News)
