Shillong, Jylliew 07: U Subhasish Choudhury Media Cell Convener jong ka seng BJP ha kane jylla Meghalaya u la ong ba ka jylla Meghalaya ka la leit na ka ba sniew sha kaba kham sniew ha kaba kane ka sorkar kam don wat tang kawei ka kam kaba ka la leh ban ioh ia ka jingiaroh la kynnoh u tei u nongialam ka BJP.
U la ong haba peit ha ka liang ka shongsuk shong sain ha Garo Hills kala pynshisha ba ka sorkar kan lah ban teh la kam ia ki kam lehnoh. Kumba ka long mynta ki paidbah ha Garo hills kim don shuh ha ka jingshong shngian.
U tei u nongialam jong ka BJP u la kynnoh ba u myntri rangbah ka jylla u pynlut por bun sien ha ka Nongbah Delhi, ha kaba khatduh ym banse ban phla ba ki don ki lehnoh na ka jylla Assam kiba la rieh tngen ha Garo hills.
Ha dien ba la ioh ia ka myntri kam poh iing da ka long kmie na ka liang jong ki paidbah ki la don ka jingkyrmen ba ki khyllung khynnah kynthei kin ioh ia ka jingsngewngian hynrei ka jingshah leh beijot jong ki kynthei ka la nangjur bad u pulit u ba la leh ia ki kam khlem rain u dang lait ban phet na ka kti jong ki pulit kane ka long ka jingleh rain.
Haba phai sha ka pule puthi na ka liang jong kane ka sorkar mynta kam don por shuh ban peit ia ka pule dangle ban pynbeit ia ki jingeh baroh kaba ki samla pule jong kane ka jylla ki ia kynduh.(SP News)
