Shillong, Nailar 26: U Chairman jong ka Co-Ordination Committee on International Border (CCIB) u bah M Ryngksai u la ong ba u myntri rangbah ka jylla Assam u Tarun Gogoi bad u myntri rangbah ka jylla Meghalaya ki la shu kohnguh katba ong na ka sorkar pdeng na Delhi.
Haba kren ha u SP News Agency u Chairman jong ka CCIB u la ong ba ki ai ka jingiaroh bad ki ai ka jingkyrshan ia ka myntri rangbah jong ka jylla West Bengal ka Manata Banerjee kaba la kren pyrshah ia la jingiatehkular hapdeng ka sorkar pdeng bad ka Bangladesh ban iapynbeit ia u pud u sam hapdeng kine ki ar tylli ki Ri.
U Cahirman ka CCIB u ong ba ka sorkar kadei ban khot ia kren shuwa ia ki trai jaka ki khlieh nongsynshar ha kaba ia dei bad ka jingia pynbeit pud bad ka Bangladesh kam dei ban shu ia kren lyndet khlem da iakren bad ki trai jaka.
Kane la jingiasoi hapdeng ka sorkar India bad ka Bangladesh ka long ba la leh lyndet khlem da kynjoh ktien ia ki trai jaka bad ia ki nongsynshar kiba tip kham bha ia ki jaka puta. Ka myntri rangbah jong ka west Bengal ka sngewthuh ia ka jingduh jong ki paidbah na kata ka daw ka pyrshah.
Ka CCIB ka kwah ban tip ia ka nongrim jong ka sorkar Meghalaya bad kaei u myntri rangbah ka jylla u don ban ong ha kaba ia dei bad kane ka jingiapynbeit pud namar kumba ka long mynta ka jingiateh kular kaba la ia soi ka nongshiliang ka jingduh ka long ia ka jylla Meghalaya la ong u Bah Ryngksai.(SP News)
