Shillong, Jymmang 05: Ka FKJGP Southern Riwar Zone (Shella Area) hadien ba ka la ioh ia ka jingujor na kiba bun ki paidbah bad kumjuh na ki nongialam shnong ha kaba iadei bad ia jing issue ia ki birth certificates sha ki bar jylla kiba suba ruh ba kidei kiba shu wan prong tuh na shiliang khappud jong ka Ri Bangladesh da u Dr. M.Kar jong ia Ichanmati CHC ba la pyniaid da kawei ka NGO kaba la tip kyrteng kum ka Citizen Foundation.
Kum ka seng kaba imsngi ban peitngor ia ka jing wan rung kyrthep jong ki mynder kiba la nang jyllei katba nang mih ki sngi khamtam ha kitei ki jaka khappud ha ka 04th May 2013 ka seng kala pynlong ka jingleit jurip kaba kyndit kyndit ia katei ka CHC kaba don ha ka shnong Ichanmati ban lap ia ki jing shisha baroh, ha katei ka sngi na ka liang jong ki Nongialam jong ka seng kila lap ba ka don shisha kata ka jing issue pathar ia ki Birth Certificate sha ki briew kiba ym lah satia ban pyn tikna la kidei shisha ne em kiba la kha ha kane ka thain bad ha ka Ri India hynrei la shi ai beit ia ki birth certificate khlem kano kano ka jing pyn shisha kaba tikna bad kaba bnaih na ka liang jong ki Nong Synshar shnong.
Ka Seng kala maham tyngeh pyrshah ia utei u Dr. M.Kar jong ka Citizen Foundation ba u dei ban kham adkar lym kumta ka seng kam banse ban shim da kiwei pat ki lad ki lynti lada ka long ha kano kano ruh ka bynta khnang ba kum ka jaitbynriew kan ym shah tyllep noh ha ki briew kiba nabar. Kaba kham sngew thamula bad kaba la pyn suba sniew arshah ia ka Seng ka long ba la lap hapoh jong ka Register ia ka jingleit jurip jong u SDO, Sohra Civil Sub Division.
U Bah Cyril Diengdoh (IAS) ha kaba na ka liang jong utei u heh sorkar ruh u la hukum pynban ia ki bor pyniaid jong katei ka CHC ha Ichanmati ba dei beit ban issue ia ki Birth Certificates sha baroh kiba wan pan na katei ka CHC, ka seng ka sngew ba kum uwei na ki officer khasi lada u don shisha ka mynsiem kitkhlieh na ka bynta la ka jong ka Ri bad ka Jaitbynriew u la dei ban bishar bniah shwa bad tip ruh ia ka daw tynrai shaphang ka jinglong jingman jong kitei ki jaka khappud ym satia ban shu ai hukum laplah ioh ka kyrtoh kylla ia ka Jaitbynriew ban shu kylla rit paid hala ka jong ka ri. Lada ka long ha kane ka rukom ka pynbor ruh ia ka seng ban sa lum syndon da ka jingialang kaba kyrpang ia baroh ki Nongsynshar Shnong ban shim pat da kiwei ki lad ki lynti wat haduh u pud ban pynher krad shisyndon ia baroh kiba donkti ban pynshlur ia ka jing rung kyrthep jong ki mynder.
Kyntang iawai ka Seng ka pan ruh ia ka jingkyrshan na baroh ki Nong Synshar shnong, naduh u Syiem jong ka Hima Sohra, ki Nongmihkhmat paidbah (MLA, MDC) bad kumjuh ruh na ki paidbah Nong shong shnong kiba dei ki trai ri trai muluk ban ieng tylli kawei ban iada iala ka jong ka khyndew ka shyiap bad ban nym ailad da lei lei ruh ia ki khwan myntoi shimet. La ong u Bah B Rynga president ka FKJGP jongka Southern Zone.(SP News)
