Jowai, Naiwieng 21: Ka KSU Myntriang Unit ka pynpaw ka jingpyrshah jur ia ka jingpyndonkam bakla u bah Wolding Lamurong uba long u Rangbah shnong jong ka shnongMyntriang, bad ha kajuh ka por kum u Secretary ka VEC ka shnong, iala ka iktiar halor ka jingpyntreikam thur mur ia ka NGREGS, ha ka 19/11/2013, hapoh ka shnong khlem ka jingmynjur bad jingtip jong ki nongshong shnong lyngba ka Dorbar, la kynnoh ka KSU na katei ka shnong.
Ka seng ka kynnoh ba katei ka dei ka jingleh ban myntoi shimet jong U, la kum ba katei ka Skim jingpynroi ka dei tang na ka bynta jong u ym na na bynta ka shnong.“Ka jingpynbna ban pyntrei ia katei ka kam ka long hapoh iingmane Presbyterian ym hapoh ka Dorbar shnong kaba dei ka rukom pyniaid shnong . Kane ka pynpaw ia ka jingkhein troin ia ka burom ka Dorbar shnong Myntriang bad ia ki nongshongshnong jong ka”, la pynpaw u bah Channel Lamurong, uba long u Vice President ka KSU Myntriang Unit.
Haba ba pan jingpynshai bad ia kren sngewthuh bad U Rangbah shnong , kaba pynlyngngoh ia kiba bun ka long ba u kob sarong ia ki briew kiba kwah ban wad ia ka jingshisha halor ka jingpyntreikam ia katei ka Skim hapoh ka shnong, ban ialeh bad u da ka bor lada don ba nud. Katei ka jingleh jong u ka long kum ka jingpyrshang jong u ban ialam biang ia ka shnong sha ka juk maw ha ka jaka ban ialam ia ka sha ka lynti ban ia sngewthuh lang baroh ki nongshong shnong jong ka.
Ka seng ka suba jur ba katei ka jingleh u rangbah shnong ka lah ban dei hadien ba u la tip ba ka seng ka la dep ban pan RTI halor ka jingpyntreikam ia ka NREGS hapoh Myntriang na Saipung Block ha kine ki taiew ba la dep. Ka seng kan ym shongthait tad haduh ba kan da lap ia ki jingshisha baroh halor ka jingpyndonkam ia ka skim NREGS hapoh shnong ha kine ki snem ba la dep bad haduh mynta ruh.
Halor kitei ki kam, ka seng ka pynrem jur ia katei ka jingleh donbor bad kod ia shoh jong u Rangbah shnong/secretary ka VEC Myntriang bad ki katto katne ia ki briew. Ka seng KSU kan ym kyiuh ne tieng halor katei ka jingpyntieng kohtympan jong utei u Rangbah (bad ka VEC) bad kan wad ia kijingshisha ba tap eitmiaw jong u ha baroh kine ki snem ba la dep, la ong ka KSU Myntriang Unit.(SP News)
