Shillong, Naitung 23: Ki seng bhlang kiba kynthup ia ka FKJGP, KSU, CSWO, TUR, HNYF, TUR ryngkat badki trai shnong kiba shah ktah ha ka New Shillong Township ki la pynpaw ia ka jingsngew bynniaw ka jong ki ba ka sorkar kam shym la ailad ba kin pynlong ia ka jingialang paidbah ban ia kren halor katei ka jingkwah shim jaka shuh ka sorkar.
Naka liang jong ki seng bhalang ki kynnoh ba kane ka jingleh jong ka sorkar ka long ba ka sorkar mynta ka la poi sha ka kutlad namar ka tieng ia ka jingiakhih kaba dei hok jong ki paidbah.
Haka juh ka por ki buh ruh ia ka jingkylli ia ka myntri sorkar ba balei ka sngap jar ia ka jingkhot jong ki seng bhalang ban ia tai ia kane ka kam ha khmat jong ki paidbah. Kane ka jingsngap jar ka pyni ba ka sorkar ka kwah ban shu leh da ka ka bor ban shim ia ki jaka ban tei ia ka NST.
Lada ka sorkar ka la leh ha ka lynti kaba dei ban thied ia kitei ki jaka kam dei ban khanglad ia ki seng bhalang ban pynlong ia ki jingialang paidbah bad ka dei ban kloi ban wan sha khmat ban ia kren haba shit ba shai.
Wat la ka sorkar ka leh ha kane ka rukom hynrei na ka liang jong ki paidbah kin nym kynran dien bad ki don ka jingkyrmen kaba skhem ba ki paidbah kin sa ioh biang ia ka hok ka jong ki katkum ki kyndon ain jong ka riti synshar ha kane ka ri India.(SP News)
